Suliniutinut angisuunut inatsit sanaartortunit nuannaarutaasoq

Nunanit allanit suliartortunut inatsit, Folketingip tapersersorniarlugu sapaatip akunnerani kingullermi aalajangiuppaa. Taama aalajangertoqarnera suliniutit angisuut pillugit inatsisip pilersinneqarnissaanut aqqutissiueqataavoq.
Allattoq Jaaku Lyberth
juunip 19-at 2014 05:38

Kalaallit Nunaata naalagaaffeqatigiillu taama aalajangernerat isumaqatigiinnerallu ineriartornermut peqqinnartuusoq, Danmarkimi aviisiliortut sanaartorneq pillugu suliariumannittussarsiortarnermik allaaserinnittartut allapput.

Suliariumannittussarsiuussisarfiup aaqqissuisua ullumi allappoq, nunanit allanit suliartortunik tikisitsiortornerup inatsisip nutaap pilersinneqarnerata kingorna akorngutinik nutaanik saqqummerartoqassasoq. Taamaakkaluartorli inuussutissarsiutit pillugit suliniutinut malittarisassat nutaat pilersinneqarnerat ajunngitsumik ineriartornermut tikkuussisuusoq isumaqarput.  

- Inatsimmi ajoqutaasinnaasut arlaqarsinnaapput, suliaqarfinnili ajunngitsumik qisuariartoqarpoq, ingeniørinummi siunnersuisartunut Danmarkimi Kalaallit Nunaannilu suliassiisinnaasoq, pingaarnertut allaaserisami eqqaaneqarpoq.

- Inatsisillu kingunerisaanik akissarsiatigut sulinermilu atukkatigut apparsaanermik kinguneqassanersoq siunissap takutikkumaarpaa.

Sanaartorneq pillugu atuagassiaq isumaqarpoq, inuiaqatigiit atlantikup avannaamiuisa ilusilersornissaat pilersinneqartariaqalersoq. Tamannalu aatsaat pilersinneqarsinnaasoq nunat assigiinngitsut akornanni suliffeqarfissuit inatsisitigut ajunngitsumik periarfissinnerisigut.

- Inatsisip nutaap nunat allamiut suliffeqarfiutaasa sulinissaat inatsisitigut tunngavissaqalersissavaat, suliallu inatsisit malillugit ingerlallugit, paatsiveerunnermik eqqartuussivilersornermillu kinguneqanngitsumik, aaqqissuisoq taama allappoq.

Aamma atuaruk