Suliniaqatigiiffik nutaaq Siumumik nukittorsaaniarpoq
Suliniaqatigiiffik nutaaq partii Siumumut atasoq ukiortaamit pilersinneqarpoq. Ilaasortat pingasut, Markus E. Olsen, Kalistat Lund aamma Peter Frederik Lyberth suliniaqatigiiffimmik nutaamik “Siumut alloriaqqikkumalluta”-mik taasaminnik aallartitsinerminni perorsaaneq, ilinniartitaaneq isumaginninnerlu siuarsarniarpaat.
Allattoq Louise M. Kleemann
januaarip 05-at 2009 11:20
Tamanna Siumumi pioriinnginnersoq, pilersitsisut ilaat Peter Frederik Lyberth aperineqarami akivoq piffissami qaangiuttumi namminneq nalilersimallugu suliassatigut salliutinngippallaarneqarmata siuarsaajumallutik.
- Taamaattoq ima paasineqassanngilaq partiimik allamik aallartitsiniartugut imaluunnit partiip siulittaasoqarfia programmiiluunniit naammaginngikkigut, piumassuseqarpugulli siuarsaanissatsinnut, Peter Frederik Lyberth erseqqissaavoq.
Kiisalu erseqqissaatigaa namminersulivinnissamut aamma naaggaarnertut nalilerneqassanngitsoq, partiip iluani siuarsaanissamik taakkartuilluni suliniaqatigiiffimmik pilersitsinissaq namminneq aallartikkamikku.
