Suliffitsialannik toqqaasoqarpoq

Nunatsinni Suliffigissaasut ”Suliffitsialammik” tallugu 2001-mili aallartittumik ukiut tamaasa unammisitsisarput. Ukioq mannalu suliffeqarfiit ukiup suliffitsialaatut toqqarneqartut marluusut saqqummiunneqarput. Ilisa Isaksen paasissutissiissaaq:

Ukioq manna Suliffitsialattut toqqarneqarput Permagreen Grønlands A/S-ip, Narsami immikkoortortaa aamma Pilersuisoq A/S-ip Kangaatsiami pisiniarfia; Pisiniarfeeraq.

Unammisitsinerup ilaatigut siunertaraa suliffeqarfiit sullivinni avatangiisitigut annertuumik pitsanngorsaateqarlutik suliniuteqartut ersarissarnerisigut suliffeqarfiit allat pitsanngorsaanissamut isumassarsitinneqarnissaat.

Kangaatsiami Pisiniarfeeqqap nutaaliaasunik qarasaasiatigut atortulersorneqarneratigut, aqutsisunut attaveqarneq pitsanngorsarneqarsimavoq.

Suleqataasut inuttut inerikkiartornermi pikkorissarnernut peqataasimapput tarnikkullu imminut ikiorseeriaatsinik peqalersimallutik suleqataasut akunnerminni atuisunillu atorneqartartunik.

Ajugaasut aappaata Permagreen Grønland A/S-ip, Narsami immikkoortortaa ingerlalluartumik isumannaallisaanermut suleqatigiissitaqarpoq.

Sullivimmi nalilersuinerup inernerinik suliaqarnermut atatillugu sulisuusut sulinermi avatangiisitigut amerlasuutigut pitsannguisimapput. Oqimaatsunik kivitsisarnerit annikillisarniarlugit ilaatigut kivitsissutinik pingasunik, atortorissaarutinillu allanik pisisoqarsimavoq.

Ukioq manna suliffitsialattut toqqagaasut Katuami aqagu unammisitsinermut illersuisumit Naalakkersuisunut ilaasortamit Siverth K. Heilmannimit akissarsisinneqassapput.