Suliffitsialak toqqarneqassaaq

Suliffitsialammik qinersisoqaqqilerpoq.

Sullivimmi suliffigissaanermi tarnikkut atukkat isumannaallisaanerullu siuarsarnissaa tunngavissatut ukioq manna sammineqarput.

Allatut oqaatigalugu sullivinni persuttaasukinnerulerluni, paamisaarisukinerulluni nakkarsaasukinnerulissaaq. Aamma sullivinni ajutoortarnerit ikinnerulissapput. Sullivinni ajutoornerit nalunaarutigineqartut siorna 340-uupput.

Suliffitsialattut taaguuteqalerniarluni unamminermi sulliviit suulluunniit peqataasinnaapput.

Nunatsinni Suliffigissaaasut siulittaasuat, Sten A. Lund, oqarpoq, suliffinni ajutoortarnerit assiigiinngitsut pisariaqanngikkaluartut eqqumafigigaanni ikilisinneqarsinnaammata.

- Sullivinni ajutoornerit ikilisarneqarsinnaapput, isumannaallisaariaatsit assigiinngitsut suliffeqarfinni eqqumaffiginerisigut. Sillimaniarnermut ilitsersuutit malinnissaannut eqqumaffiginissannullu sulisut sulisitsisullu tamarmik pisussaaffeqarput. Ukiuni kingullerni malunnarsiartorsimavoq ajutoortarnerit ajoraluartumik amerliartortut, Sten A. Lund oqarpoq.

Sullivinni tarnikkut atukkat Suliffitsialanngorniunnermi aamma aallaavigineqassapput.

- Paasineqarsimavoq, sullivinni tarnikkut ajortoqaraangat napparsimanerit sulinngitsoornerillu amerlanerusartut. Taakkualu ikilisinniaraanni aqqutissat ilagivaat, sullivimmi tarnikkut atugarisat pitsanngorsarnissaat, Nunatsinni suliffigissaasut siulittaasuat, Sten A. Lund, taama oqarpoq.

Suliffitsialammut peqataanissamut novembarip 30-at killigitinneqarpoq.