Suliffissarsiortutut nalunaarsorsimasut amerleriarsimapput
Suliffissarsiortutut nalunaarsorneqarsimasut ukioq manna juunimi 3.592-upput. Siorna juunip qaammataani 3.473-ullutik.
Suliffissarsiortutut nalunaarsimasut allattorsimaffiat illoqarfinni nunaqarfinnilu naatsorneqartarput, suliffissarsiorlutik nalunaarsimasut amerlanerit tassaallutik arnat angutillu inuusuttut 20-it 24-illu akornanni ukioqartut, Naatsorsueqqissaartarfik taama nalunaaruteqarpoq.
Illoqarfiit ataasiakkaat naatsorneqarnerini Nuummi juunip qaammataani 2015-mi suliffissarsiortutut nalunaarsorneqartut siorna juunip qaammataanut sanilliulugit ikinnerupput.
Siorna juunimi Nuummi suliffissarsiortutut nalunaarsorneqartut 942-upput ukioq manna 725-nut ikileriarlutik tassalu 200-nik ikinnerullutik.
Qaqortumi Aasianni Ittoqqortoormiini aamma Upernavimmi suliffissarsiortutut nalunaarsorsimasut ikinnerulersimapput, Paamiuni, Maniitsumi, Sisimiuni, Qasigiannguani kiisalu Uummannami suliffissarsiortutut nalunaarsorneqartut amerlanerulersimallutik.
Qeqertarsuarmi Tasiilamilu suliffissarsiortutut nalunaarsorneqartut amerleriarnerpaapput. Qeqertarsuarmi siorna suliffissarsiortut 16-niusut ukioq manna 72-nut amerleriarput, Tasiilami suliffissarsiortut ukioq manna 375-upput siorna 221-ullutik.