Suliffissarsiortut nalunaarsorneqarnerulissapput

Suliffissarsiuussisarfiit iluarsaateqqinnerannut atatillugu nuna tamakkerlugu internettikkut suliffissarsiortarfissamik pilersitsinissaq ilaavoq. Taamatut suliffissarsiortitsisarneq manna tikillugu kommuuninit ingerlanneqarsimavoq, kisianni Piareersarfiit januaarip aallaqqaataaniit nutaamik aaqqissuuteqqinneqarpata, ilaatigut suliffissarsiuussisarfittut siunnersuisarfiutigalutik piginnaasanik qaffassaavittut atorneqalerpata, ilanngulluni periarfissaalissaaq.

Taamaaliornikkut siullerpaamik anguniarneqarpoq nuna tamakkerlugu suliffissaaleqisut qanoq iliuuseqarfigineqarnissaannut sakkussaqalernissaq.

Nittartakkatigut suliffissarsiuussisarfiup atulerneratigut anguniarneqarportaaq suliffissaaleqisut piginnaasaat sulisussarsiortut amigaatigisaminnut piginnaasatut piumasaqaataannut takussutissatut, taamaaliornikkut suliffissaaleqineq annikillisinniarneqarpoq, soorlu aamma ilinniarsimanngitsunik avataanit tikisitsisarneq annikillisinniarneqartoq.

Tamatuma saniatigut kommuunit suliffissarsiuussisarfinnik ingerlatsinerat sukaterneqassaaq. Nunatsinni kommunalbestyrelsit suliffissaaleqisut ataasiakkaarlutik pilersaarusiuunneqartalernissaannut suliniuteqartarnissap qulakkeerneqarnissaa pisussaaffigilissavaat. Taamaaliortanngippatalu Naalakkersuisut suliffissarsiuussisarfinnut aningaasaliissutigisartakkaminnut akuliussinnaatitaalissapput.

Kisianni aamma suliffissarsiortunut piumasaqaateqassaaq. Suliffissarsiortummi suliffigisimasami ilinniarsimasanilu nalunaarsortalissagai piumasaqaataassaaq. Soorlu aamma suliffiit sorliit suliffigerusunnerlugit suliffissarsiortoq nalunaartalissaaq. Taamaalilluni suliffissarsiortup piginnaasai nalunaarsorneqartalissapput. Aamma misilittakkanut nalunaarsuiffik nutarterneqartassasoq piumasaaqaataassaaq. Suliffissarsiortorlu taamaaliortanngippat pisortat ikiorsiissutaat suungaluartulluunniit unitsinneqarsinnaalissapput.

suliffissarsiortulli paasissutissat imminerminut tunngasut nammineerluni nalunaarsorsinnaanngippagit, taava suliffissarsiuussisarfiit siunnersuisarfiutigisut kommunalbestyrelsi sinnerlugu pisussaatitaapput paasissutissanik nittartakkamut ilisinissaminnut. Suliffissarsiuussisarfinnut tunngatillugu inatsisissaq nutaaq piffissami matumani tusarniutaavoq. Tusarniaaneq aggustip qiteqquneranut killilerneqarsimalluni.