Suliffissaqarfiusunut nuukkusuttunut aningaasaliissutaasartut amerliartorput
Nunatta iluani suliffissaqarfiusunut nuunniartut kisimik taperneqarsinnaasarput.
Jakobine Leander, Suliffeqarnermut, inuussutissarsiutinut ilinniartitaanermullu pisortaqarfimmi SIIP-imi siunnersorti oqarpoq, aningaasaateqarfik ilikkariartorneqartoq:
- Aggustip 15-iata missaani kommuninut nalunaaruteqarnitta kingorna aningaasaateqarfik ilisimaneqaleriartorpoq. Malunnarpoq innuttaasut ilisimajartoraat imaaqa tusartakkatik naapertorlugit, aamma saaffiginnittorpassuusarput.
Maannanut qinnuteqartut 15-iusimapput. Kommuninilu suliffissarsiuusisarfiit piumasaqarfigineqartarput, qinnuteqartut suliffeqarfissaaningaanniit uppernarsaammik peqqaarnissaat.
Angalanermut bilitsit aamma pequttat assartornerannut, poortoriarlugit containerinut immiullugit, assartorlugit, nuuffimmilu puuiarnerannut aningasaliisoqartarpoq.
Kisianni nalunaarut malillugu aningaasaateqarfik inissaqarnermut tunngassuteqanngilaq.
- Inissaq qulakkeerneqanngilaq, kisianni aningaasat inissamut tunngasut pisortaqarfimmi allamiipput, Jakobine Leander nassuiaavoq.
Aningaasaliiffigineqartut kingorna pisortaqarfimmiit malinnaaffigisarneraat aperaarput.
- Isumaqatigiissuteqarlutik suliffeqarfinnut atorfinikkaangata qinnuteqaataallu akuerineqaraangata naatsorsuutigisarparput atorfininnerat ataavartuussasoq, oqarpoq.
Qinnuteqartut illoqarfinninngaanneersut amerlanerunerarpai, aammali nunaqarfinninngaanneersut ataasiakkaat takusarnerarlugit.
- Nuunniartarput illoqarfimmiit illoqarfimmut aamma nunaqarfimmiit illoqarfimmut kiisalu illoqarfimmiit nunaqarfimmut.
Jakobine Leander aamma oqarpoq, maannamut qinnuteqartut 14-it akuerineqarsimasut, amerlanerpaat sanaartornermi suliffissuarnilu sulilernissartik pillugu qinnuteqartuusut.
Nuunnissamut annerpaamik 40.000 koruuninik tapiisoqarsimavoq.
Illoqarfiit Uummannaq, Sisimiut, Aasiaat aamma Paamiut suliffissarsiuussisarfii qinnuteqartuunerusimapput, qinnuteqaanneqartullu amerlanerpaartaat iluaqutariiupput. Nuummut nuuttut amerlanersaallutik pingasuusimapput.