Oline Binzer, eqqumiitsuliortoq Københavnimi najugaqartoq, Kalaallit Illuutaata ungasinngisaani pisiniarfimmik Kalaallit Nunaannut tunngassuteqatunik nioqqutissaateqarluni tallimanngornermi novembarip 26-ani ammaavoq. Taamatut isumassarsinerminut pissutigaa nammineq suliffigisinnaasaminik pilersitserusunnini.
- Eqqumiitsuliortutut sulisinnaagaluarlunga kisianni tunitsivissat ikilinikuugamik aammalu taamatut suliaqarluni ulapinnartorujussuulluni. Periarfissaq takkuteriarmat ammaavunga massakkut, Oline Binzer oqarpoq.
Oline Binzerip nammineq allalu eqqumiitsuliaat, puisip amiinik kavaajaliat kamiillu qalipakkallu nioqqutissaatigai.
-Eqqumiitsuliat assigiinngitsut kalaallit suliaat tuniniarniarpakka, taavalu saniatigooralugu puisit amii, taskit, støvlit, aaqqatit, isersimmatit assigisaallu tuniniassavakka.
Oline Binzerip pingaartippaa nioqqutissanik neqerooruteqarnermini nioqqutissat oqaluttuassartaasa eqqortumik saqqummiunneqartarnissaat.
-Kalaallit amerlavallaannginnamik pisiniarfiutillit maani Københavnimi. Isumaliorpunga kalaalerpaluttunik tuniniaassagaanni Kalaallit Nunaannik ilisimannilluartumik ingerlanneqaruni ajunnginnerussasoq, nassuiaavoq.