Suliffissaaleqisut siorna ikileriarput
Nunarsuatsinni nunani assigiinngitsuni suliffissaaleqisut amerliartuinnaraluartut, tamanna Nunatsinni killormut sammisoq Naatsorsueqqissaartarfiup nalunaarutigaa.
Allattoq Elisa Isaksen
maajip 24-at 2009 17:47
Kisitsisit nutaat Nunatsinni 2008-mi suliffissaaleqisunut tunngasut saqqummiunneqaqqammerput, taakkunanilu takuneqarsinnaavoq, illoqarfinni suliffissaaleqisut agguaqatigiissillugu ukiup siulianut naleqqiullugit siorna ikileriarsimasut.
2007-imi suliffissaaleqisut agguaqatigiissillugu 1.496-iupput, 2008-milu ikileriarlutik 1.133-upput. Tassa agguaqatigiissillugu siorna suliffissaaleqisut ukiup siulianut sanilliullugit 363-inik ikileriarsimapput.
Naatsorsueqqissaartarfiup kisitsisaatai najoqqutaralugit 2008-mi Sisimiuni suliffissaaleqisut ikinnerpaapput, tassa sulisinnaasut 1,7 procentii suliffissaaleqigamik.
2008-mi Nunatsinni sulisinnaasut katillugit 28.078-iupput.
