Suliffissaaleqisut ingerlariaqqinnissamut ikiorserneqartalissapput

Nunatsinni suliffissaaleqisut sulilersinniarlugit ilinnialersinniarlugilluunniit, aningaasaliisoqarnialerpoq.

Meeqqat atarfiini piareersarfinniit atuartut anisimasut, ilinniaqqinnissaannut piareersarniarlugit, inuttut ineriartornermut tunngasunik pikkorissartinneqartalissapput.

Pisortanit ikiornserneqartarneq pillugu Inatsisartut peqqussutissaattut siunnersuutip, apriilip aallaqqaataaniit atuutilersussaq, inuiaqatigiinni sanngiinnerpaanik suliffissaaleqisunik ikiuisussaavoq.

Suliffeqannginnermiit suliffeqarnerup imminut akilersinnaanerunera, inunnut paasitinniassallugu, peqqussutissap isumagissavaa. Suliffissaaleqisut tamarmik ataasiakkaarlutik Piareersarfiit ikiorsiullugit iliuusissamik sanaanneqartassapput.

Apeqqutaaginnalissaarli iliuuseq taamaattoq naammannersoq, assersuutigalugu aatsitassarsiornermut pisortaqarfik sulisussanik amingaateqalersinnaavoq. Taama Demokraatit isumaqarput.

Inatsisartut aalajangerput, aningaasat 3 millioni koruunit suliffissaqartitsiniarnermut sulinissamut immikkoortinneqassasut. Kommunillu suleqatigalugit, pikkorissaanerit ingerlanneqassapput.

Aatsitassarsiornerit eqqarsaatigalugit, Demokraatit isumaqarput nunaqavissunut pikkorissaanerit ingerlanneqanngippata, tikisitanik tikisiortortariaqassasoq.

Demokraatilli inatsisartuni kisimiilluinartutut isikkoqarput, taamaallaalli kattusseqatigiinniit tapersersorneqarlutik. Demokraatit siunnersuutaat naalakkersuisooqatigiinnit itigartinneqaraluartoq, siumut attaviitsullu tapersersuimmata, siunnersuut ataatsimiisitaliamut ingerlateqqitassanngortinneqarpoq.