Suliffissaaleqisut amerliartuinnarput

Nunatsinni suliffissaaleqineq suli qaffaseqaaq. Kalaallit Nunaanni Naatsorsueqqissaartarfiup apriilimi naatsorsuinerani tamanna erserpoq. Tassani suli suliffissaaleqisut 4000-it sinneqartut nalunaarsorneqarsimapput. Siorna taamaalinerani 3.782-iusimasut maanna 4.037-ngorsimapput, amerleriaat 255-iulluni.
Allattoq Hagen Højer Christensen
maajip 14-at 2014 11:10

Nuuk suliffissaaleqinerpaaffiujuarsinnarpoq. Siorna apriilimi 797-iugamik maanna taamaalinerani 965-inngorsimallutik.

Qaqortumi 17-nik appariarsimagaluartut suli 218-it suliffissaqanngillat. Aamma Upernavimmi taamaappoq, minnerunngitsumillu nunaqarfiini. Tamaani aprilimi suliffissaaleqisut 259-it nalunaarsorneqarsimapput.

Illoqarfinni annerni aamma taamaappoq; Sisimiuni, Ilulissani Aasiannilu aamma suliffissaaleqisoqaqaaq. Sisimiuni 352-it suliffissaqanngillat, Ilulissani 361-it Aasiannilu 265-it.

Nanortalimmi nunaqarfiinilu suliffissaaleqineq siorna aprilimut naleqqiullugu 40-nik apparialaarsimavoq. Siorna suliffissaaleqisut 148-simallutik.

Suliffissaaleqineq Tasiilami nunaqarfiinilu appariarnerpaasimavoq - aprilimi suliffissaaleqisut 233-usimapput siorna taamaalinerani 282-usiumagaluarlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq