Suliffissaaleqinerup akiornissaanut aningaasaliipput

Ilutigalugu - Inuussutissarsiornermut suliffeqarnermullu ataatsimiititaliap siulittaasuata, Kalistat Lundip, oqaatigaa - 2 millionit koruunit kommunip nammineq aningaasaliissutigissagai, taakkulu suliffissarsiortunut suliffeqalernissamut piareersimasunut, piginnaaneqarnerulernissamut, piginnaanngorsaqqiinissamut aamma inuusuttunut 18-it sinnerlugit ukiulinnut, suli ilinniagaqalersimanngitsunut suliffittaarsimanngitsunullu, suliniuteqarnermut atorneqassapput.

- Suliffeqarnermut tunngassuteqartut ullumikkut sulissutigeqaavut, tassalu ilinniagaqaqqinneq piginnaanngorsaaqqinnerlu, aamma, naak suliffeqarnerup ilorraap tungaanut samminera kommunimi takusinnaallugu, Kommune Kujallermi assigisaanik suliffissaaleqineq unamminartoqartittuarparput. Immikkut suliniuteqarnermut tunngatillugu inuussutissarsiutilinnik suleqateqarneq sapinngisamik amerlanerpaat piginnaanngorsaqqinniarlugit toqqaannartumik suliffeqarfinnut sammititamik suliniuteqarnikkut kommunip aamma sakkortusarniarpaa, Kalistat Lund ullumi oqarpoq.