Suliffinnik aallarnisaasut angutaagajunnerupput
Ukioq manna imaaliinartoq inuussutissarsiutigalugu suliffeqarfimmik aallarnisaaniarlutik taperneqartut 75 procentingajalluinnaat angutaapput.
Tamanna inuussuutissarsiutigalugu suliffeqarfimmik aallarnisaaniarlutik ikiorseqqullutik qinnuteqaamminnik taperneqartut akornanni takuneqarsinnaavoq.
2010-mi klippekortit 19-it tunniunneqareerput, taakkunannga 14-it angutit pisimavaat, procentinngorlugu 73,7 iværksætterit angutaasimapput.
Kittaartagaq pineqartoq sullissinernut makkununnga atorneqarsinnaavoq.
Teknikkikkut nalinginnaasumik siunnersuineq, inatsisilerituut ikiorsiinerat.
Kukkunersiuisut ikiorsiinerat. Naatsorsuutit nalunaarsornerannut siunnersuineq. Qarasaasialerinermut pikkorissarnermut tunngasut.
Pisortatut ineriartorneq assigisaallu.
Ukioq manna inuit 19-it kittaartakkanik tunineqareersimapput taakkunanngalu taamaallaat tallimat arnaapput.
Siornalu kittaartakkat tunniunneqartut 71 procentii aamma angutinut tunniunneqarsimapput.
Ukiummita siuliini qanoq isikkoqarpat?
Nunatsinni Takornariaqarnermi Inuussutissarsiornermilu Siunnersuisoqatigiinni Ineriartortitsinermut Pisortaq ima oqarpoq:
-Ukiut kingulliit pingasut sisamat assigiittorujussuupput taakku kisitsisit agguataarnerannut arnat angutillu aallarnisaasut assigiinngissutaat ersarissuusoq, Mads Daniel Skifte oqarpoq.
-Arnat frisør-itut (nujaleriffinnik) imaluunniit cafe-nik (kaffisorniartarfinnik) aallartitsinissaminnut ornigisaqarnerupput, angutilli silami assassornermi suliaqarnermik, soorlu ruujorilerisutut sanasutut assigisaannilluunniit soqutigisaqarnerullutik. Kisianni takornariaqarnerup iluani agguataarneri assigiittorujussuupput.
GTE immikkut arnanik aallarnisaasussanik kajumissaarinissaminut pilersaaruteqanngilaq.
-Naamik suiaassutsit tunngavigalugit kaammattuineq taanna immikkoortinneqarneq ajorpoq, Mads Daniel Skifte Nunatsinni Takornariaqarnermi Inuussutissarsiornermilu Siunnersuisoqatigiinni Íneriartortitsinermut Pisortaq oqarpoq.
Kommunerujussuanngornerup kingunerisaanik aallarnisaasunik siunnersuineq kommunenit tigujartuaarneqarpoq, kommuneqarfik Sermersuumi aallartereerluni, kommunenilu sinneruttuni pingasuni tigusiartuaarnerup ingerlanneqarnerani Nunatsinni Takornariaqarnermi Inuussutissarsiornermilu Siunnersuisoqatigiit saaffigineqartarallassapput.
