Innarluutillit ulluat: Suliffinni innarluutilinnut atugassarititaasut qanoq ippat?
Decembarip pingajuat innarluutilinnut pingaaruteqarpoq. Tassami Naalagaaffiit Peqatigiit innarluutilinnut ullorititaraa taamaammat nunatsinni innarluutilinnut pisinnaatitaaffiit isiginiarneqassasut, innarluutillit illersuiat, Christina Johansen oqarpoq.
- Uagut Tiliumi ullut tamarmik inunnut innarluutilinnut naleqqussagaapput aamma maluginiartittarpagut, kisiannili decembarip pingajuat immikkoorluinnarpoq, taanna tassa FN-ip isumaqatigiissutaaneersoq, tassa pisinnaatitaaffinnut tunngasunik malunnartitsisussaq, uagut ullumikkut soorunalimi malunnartinniarsarisussavarput. Sømandshjemmemi ualeru kaffillertussaavugut.
AAMMA ATUARUK Innarluutillit peqatigiiffiisa kattuffii ilaasortassaaleqipput
Inuiaqatigiinnit inuit tamarmik innarluutillit pisinnaatitaaffii pillugit suliniuteqarsinnaasut, Christina Johansen oqarpoq. Matumanilu siullertut sumiiffigisartakkani innarluutilinnut atugassarititaasut isiginiarneqarsinnaapput.
- Assigiinngitsorujussuarnik iliuuseqartoqarsinnaavoq, kisianni immaqa ullumikkut sumiiffipput tunngavigalugu eqqartulaarsinnaassavarput, soorlu inummik innarluutilimmik suleqateqarpugut, suliffipput inuup innarluutillip aamma suleqataanissaanut naleqqussagaava, ullormut pisiniarfileriniarutta aamma piniarfiup isaariaa inuit innarluutillit aamma iserfigisinnaavaat, Christina Johansen oqarpoq.
Ulloq malunnartinniarlugu assigiinngitsumik eqqartorneqarsinnaapput.
AAMMA ATUARUK Innarluutillit pisinnaatitaaffii pillugit isumaqatigiissut atuaruminarsarneqarpoq
Innarluutillit illersuisuata ulloq malunnartinniarlugu innarluutillit pisinnaatitaaffii qaammarsaatiginiarpai. Sisimiunilu Sømandshjemmimi kaffillernerminni taamaaliussallutik.
Kaffillernermi ilaatigut innarluutillit pillugit isumaqatigiissutit pillugit saqqummiisoqassaaq innarluutilinnullu isumaqatigiissut pillugu eqquiniaasitsisoqassalluni.
