Tilioq: Innarluutillit pisinnaatitaaffii pillugit isumaqatigiissut atuaruminarsarneqarpoq
Inuit Innarluutillit Illersuisuata Christina Johnsenip isumaqatigiissutip atuaruminartuunissaa paasiuminartuunissaalu anguniarlugu isumaqatigiissut ersarissarnikuuaa.
- Uannut pingaaruteqarluinnarpoq innuttaasut tamarmik pisinnaatitaaffitik nalussanngikkaat, taamaattumik isumaqatigiissut atuaruminarsarlugu saqqummersipparput, neriulluta innuttaasut pisinnaatitaaffimminnik paasinnilluassasut, Inuit Innarluutillit Illersuisuat Christina Johnsen oqarpoq.
Isumaqatigiissut atuaruminarsagaq Sisimiuni Tiliup isumasioqatigiissitsinerani ataatsimeersuartitsineralu novembarip qulingiluaanni aqqarnganilu NunaFondenip tapiineratigut saqqummiunneqassaaq.
Naalagaaffiit Peqatigiit inuit innarluutillit pisinnaatitaaffii pillugit isumaqatigissutaat ataatsimeersuarnermi isumasioqatigiissitsinermilu sammineqassaaq, isumaqatigiissullu atorlugu inuit qanoq ililluta inuit innarluutillit atugaat pitsanngorsarsinnaanerigut paasiniarneqassalluni.
Ataatsimeersuarnermi nunatsinni innarluutillit peqatigiiffii tamarmik Tiliup qaaqquai. Inuit 30-t missaanniittut suliffeqarfinnit aqqaneq-marlunneersut peqataassapput. Taakkulu Ilulissaniit Ittoqqortoormiit tikillugu aggersuussapput.
