Suliffeqarfippassuit Bella Centerimi ataatsimeersuaqataapput

Nunani avannarlerni suliffeqarfippassuit nukissiorneq pillugu Københavnimi Bella Centerimi ulluni makkunani ataatsimeersuaqataapput. Nukissiornermi mingutsitsinerit qanoq annikillisarneqarsinnaanerat, qanorlu nukimmik sipaartoqarsinnaanera pillugit isummersoqatigiittoqarpoq. Illuliornermi kiffiutiliorfimmit, Rockwoolimit, ussinnerusunik illuliortarnikkut sipaarniarsinnaaneq soorunami aqqutissat ilaattut saqqummiunneqarpoq. CO2-mik aniatitsineq ussinnerusunik illuliortarnikkut affaannanngorsinnaasoq, Rockwoolimi tusagassiisartup, Thomas Nordlip, oqaatigaa. Minnerunngitsumik Kalaallit Nunaanni inissiat oqorsarluagaanerusarnissaat, Thomas Nordlip taavaa.
novembarip 26-at 2008 17:25

Tusarluarnartut ilagaat teknologi ullumi ilisimaneqartoq atorlugu kiassarnermut nukissiamik atuinerup 50-imiit 90 procenti tikillugu sipaartoqarsinnaanera - Taamaalillunilu aamma CO2-mik mingutsitsinerup annikillisarsinnaanera tusarluarnarpoq.

Soorlu illugisat ussissarluarukku, igalaallu immaqa taarserlugit, saniatigullu teknologi ullumi atorneqarsinnaasoq atorlugu kiassaateqaleruit, nukissiamik atuinerit affaannanngortissinnaavat, ussissaalluaruillu 85 procenti tikillugu sipaarsinnaavutit – aningaasat sipaarutissat ulluinnarni inuuniarnermi atorsinnaaligassatit, Thomas Nordli oqarpoq.

Kalaallit Nunaanni inissianik kiassaaniarneq taama akisutigitillugu, aningaasat sipaarneqarsinnaasut ikigisassaanngillat. Assersuutigalugu Danmarkimi illu qarmagaq, 1927-mi sanaaq ussissarluaratsigu kiassarnermullu atortut taarsersorlugit, illumik piginnittoq ukiumut 20.000 koruuninik sipaartalerpoq. Ussisaalluarnermut igalaanillu taarsersuinermut 157.000 koruuninik aningasartuuteqarami ukiut arlaqanngitsut ingerlaneranni aningasartuutini matussusersinnaavai, sipaakkanilu inuulluaatigisinnaalerlugit, Thomas Nordli oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq