Suliffeqarfinnik aallarnisaasunut sullissivik Nuummi immikkoortortaqarfiliortoq
Suliniut "Mind Your Own Business", Kunngissakkut isumaginninnikkut suliaqartunut nersornaasiuttagaanik tunineqarsimasoq, nukappiaqqanik inuusuttunik namminneq suliffeqarfiliornermik aallarnisaaneranni, inuussutissarsiornermik ingerlatsisut namminneq kajumissutsiminnik suleqataasut peqatigalugit ikiuisarpoq.
Nunatsinni inuusuttuaqqat aallarnisaasunngornissaminnut periarfissaqalerput.
Aningaasaateqarfiup Tuborgfondenip tapiissuteqarneratigut Mind Your Own Business Nuummi immikkoortortaqarfeqalissaaq.
- Kalaallit Nunaanni allaffeqarfeqalernissarput Mind Your Own Businessimi nuannaarutigeqaarput, pisortaq Maria Kavita Nielsen oqarpoq, nangipporlu:
- Kalallit Nunaanni aallartitsiumasunut periarfissat pissanganartut ammaanneqassasut isumaqarpugut.
Nukappiaqqat 13-it 21-llu akornanni ukiullit suliniummi pikkorissarneqartarnissaat siunertarineqarpoq. Pikkorissaanerit qaammatini arfineq-pingasuni sivisussuseqartut namminneq qanoq iliorluni suliffeqarfeeqqanik aallartitsinissamik, tunisassiornermik, ussassaarinermik tuniniaanermillu ilinniarfiussapput.
Nunatsinnullumi naleqqulluinnartuusoq Nuummi VisionBoximi suleqataasoq Michael Binzer oqarpoq.
- Mind Your Own Business Kalalalit Nunaannut naleqqulluinnartuuvoq. Inuusuttagummi - minnerunngitsumik nukappissat - suliutigalutik ilinniassallutik orniginerusarpaat, atuagarsuinnarnermingarnit, Nuummi VisionBoximi suleqataasoq Michael Binzer oqarpoq.
Mind Your Own Businessimi pilersitsinissamut piginnaanitik misilittarlugillu inerisarsinnaavaat, sumiiffimminnilu inuussutissarsiornermik ingerlataqartunut pitsaasumik attaveqarfigilersinnaallugit, tamatsinnut iluaqutaalersussamik - aamma piffissaq ungasinnerusoq isigalugu, Michael Binzer oqarpoq.
Tuborgfondet Mind Your Own Business-imut 11 millionit koruunit missinginik tapiissuteqarpoq, taamatullu iliorneq aningaasaateqarfiup oqaluttuarisaanerani pisartuni aatsaat taamatut amerlatigisunik aningaasaliisoqarpoq.
