Suliffeqarfiit mikinerit neqerooqatigiittalernissamut kajumissaarpai

- Annertuumik sanaartortoqassaaq, tamannalu periarfissaq akikinnerpaaq atorlugu pisariaqarpoq. Taama oqarpoq ineqarnermut naalakkersuisoq Jens B. Frederiksen, NUSUKA-p inissialiornermi tamakkiisumik suliakkiinermi kalaallit suliffeqarfiisa tunulliutitaanissaannik ernummateqarneranut oqaaseqarnermini.

Taassuma suliffeqarfiit maaniittut suleqatigiinnissaannik kajumissaarpai, taamaalillutik suliarinninnissamut akinik unammillersinnaasunik neqerooruteqarsinnaaniassammata.

- Ukiaanerani inissiat 300-t sanaartorneqarnissaat pillugit aalajangiisussaavugut, tassanilu tallimat neqeroorput, akornanni suliffeqarfiit mikinerit arlallit kattussimapput neqerooqatigiillutik, allaat ajugaanissamut qanittuararsuusimagaluarlutik. Taamaammat mikinerit takutereerpaat aamma pisinnaallutik, Jens B. Frederiksen oqarpoq.

Taamaattorli Jens B. Frederiksenip oqaatigaa, sanaartugassanik angisuunik sanaartornermi avataaniit tikisitsilluni sulisussarsiortarneq atuukkallartariaqassasoq, inissaaleqineq iliuuseqarfigineqassappat tamanna pisariaqassasutut oqaatigalugu.