Suliffeqarfiit arpannerat nuannaffiuvoq

Inissinnerit apeqqutaanatik nuannersumik inoqatinik ataatsimuualaaqateqarnissaq pingaarnersaatillugu arpattoqarpoq, Naalakkersuisullu siulittaasuata Kuupik Kleistip arpanneq aallartillugu illuinnarsuut aallartitsisut eqippaa. Aaqqissuisoq pisoq iluatsilluartutut oqaatigaat iligiit nalunaartut 47-uummata.

Peqataasut isiginnaartullumi Inussivimmi eqqaanilu nuannersumik unnussiuaarput. Peqataasut iligiit tamarmik tamulugassanik koorimik imeruersaatissanillu tunisipput, taamaasillutik eqqissillutik tamulussinnaapput arpattussani tullinnguullutik stafetimi tigumiartagaq eqillugu kilometerit tallimat arpannissamik tungaanut. Iligiit ilaasa unammineq pimoorunneruaat, allalli eqqissisimanerusumik pipput aqqutaani pisulaannguariarlutik arpallutik ingerlaqqittarlutik.

Inussiviup iluani Tele-Postip nipilersortartui appisimaarujoorput isiginnaariarpaalussuillu najuummata nuannisarneq paatsuugassaajunnaavippoq. Aaqqissuisut tassaasut arpattartut peqatigiiffiat NAAPE aamma Tele-Post eqqoriaapput unnussiuaarnermi peqataasut 400-ut missaanniissimassasut.

Tele-Post aamma NAAPE nalunaarput, DHL stafet, aamma Danmarkimi nuannarineqarluartoq uteqqiattunngussasoq. Tamanna ingerlanneqartassaaq juunimi sisamanngornermi siullermi taamaasillunilu DHL-mi stafeti tulleq pissaaq aappaagu juunip arfineq aappaanni.

Angutini ajugaasuupput politiit hold 1, 5 x 5 kilometerit arpakkamikkit katillugit atorlugit 1 time aamma minutsit 40-ut. Arnani ajuugaasuupput Nuuk Fitness power girls, katillugit 1 time minutsillu 59-it arpattut. Arnat angutillu akuleriillutik peqataasuini ajugaasuupput Grønlandsk skoleidræt, katillugit arpattut 1 time aamma minutsit 45-ut.

Angusat linki ataaniittoq atorlugu aasinnaavatit.