Suliassarpassuit ikilisinneqartariaqarput
Maannalu Naalakkersuisunut ilaasortaq akisussaasoq iliuuseqartariartoq, Demokraatineersoq Lene Knüppel isumaqarpoq.
Taassuma isumaginninnermi maalaarutinik aalajangersaasartut ukiumoortumik nalunaarusiaat 2007-imi marsimeersoq innersuussutigaa, tassanimi amerlanerusunik aningaasaliisoqarnissaa sulisunillu amerlanerusunik pisariaqartitsisoqartoq oqaatigineqarmat.
Taamaattorli ajornartorsiut anigorniarlugu Naalakkersuisut amerlanerusunik sulisoqalernissaq imaluunniit utaqqisarnerup sivikillineqarnissaa anguniarlugu iliuuseqarsimanngillat.
- Taamaattumik naalakkersuisut eqqaasikkusuppakka innuttaasut pisinnaatitaaffiinik atuutsitsinissamut ataqqinninnissamut Naalakkersuisut pisussaaffeqarmata. Ullumikkummi innuttaasut Isumaginninnermi maalaarutinik aalajangersaasartunut maalaaruteqarsimasut inuttut pisinnaatitaaffimminnut atatillugu eqqunngitsumik pineqartutut misigisimammata. Tamanna inuiaqatigiinni nutaaliaasuni demokrati naapertorlugu ingerlasuni naammagiinnarneqarsinnaanngilaq, Lene Knüppel allappoq.