Suliassaq naammaginanngitsumik inerneqarpoq

Inatsisartut siulittaasoqarfiata suliamut atatillugu inaarutaasumik oqaatigisai qanoq oqaaseqarfigisinnaanerai Sten Lundimut apeqqutigaarput:

- Inuinnaat oqartussaaqataanerat aallaavigalugu annerusumik iliuuseqartoqannginnera tupaallaatigivara. Pineqartoq pillugu ersarinnerusumik malittarisassaqannginnera pissutigalugu iliuuseqartoqanngilaq.

Taamaalilluni apeqqusernarsigami, Inatsisartut suleriaasiat akisussaaffimmut taama angitigusumut naapertuuttuunersoq.

Taamalu isumaqarnarsilluni Inatsisartut suleriaasissamittut aalajangersagaat suliareqqinneqartariaqartoq. Tassa salluliorsimagaanni arlaatigut kinguneqartitsisoqarsinnaanngorlugu.

Taamaalilluni inuinnaat oqartussaaqataanerat piviusuunersoq aamma apeqquserneqarsinnaavoq. Tassami qinikkat tamarmik qinersisiminnut inuiaqatigiinnullu akisussaaffeqarmata.

Tassalu akisussaaffik taama angitigisoq sanioqqutaaginnarneqarsinnaanngilaq.

Paatsuunganeq apeqqutaatinnagu, arlaatigut iliuuseqartoqarsimasariaqarluarpoq. Eqqunngitsuliortoqarpammi tamanna kinguneqartinneqartariaqarmat.

Parlamentarisme eqqunneqarmat tamakkua eqqarsaatigineqarsimasariaqaraluarput.

Nunatsinni naalakkersuinikkut tunngasunik oqaaseqartartoq Sten Lund taama oqarpoq.