Suliassaq kilitsissiamut tunngasoq sammineqaqqilerpoq
Norgemi pineqaatissinneqarsimasut pillugit suliassanngortiteqqiisartut kommisionip aalajangerpaa, Treholtip kilitsissiatut pasisaaneranik suliaq nutaamik missisuiffigineqassasoq. Nutaamik missuissoqarnissamik Treholt arlaleriarluni kissaateqartarsimavoq itigartinneqartuaannarlunili.
Arne Treholt Norge-mi nunanut allanut ministereqarfimmi qaffassissumik atorfeqarsimasumut socialdemokratinilu politikeriusimasumut kilitsissiatut pasilliutaasinnaasunik Norge-mi isertortunik paasiniaasartut nammineerlutik uppernarsaatinik sanasarsimaneranik paasisaqartoqarsimanerata kingorna suliaq aallarteqqinneqassaaq.
Arne Treholt Sovjetunion-imut kilitsissiatut pasineqarluni 1984-mi tigusarineqarpoq, 1985-milu ukiuni 20ini parnaarussassanngorlugu pineqaatissinneqarluni. Atuakkiortut marluk Treholt pillugu atukkiaminni saqqummeqqammersumi isumaqarput, kilitsissiatut pasilliilluni pineqatissiissutigineqartut pingaarnersaat, Norge-mi isertortumik paasiniaasartunit ilusilersorneqarsimasoq taamaattumillu Norge-mi pineqaatissinneqarsimasut pillugit suliassanngortitseqqiisartut aalajangerput, suliaq mississoqqinneqassasoq atuakkiortut uppernarsaatitut saqqummiussaat ilungersunarmata. Kufferti aningaasanik dollarsinik imalik Treholtip pineqaatissinneqarneranut pingaarutilittut inissisimavoq. Eqqartuussisoqarnerani aningaasat Ruslandiminngaaneersuunerarlugit unnerluussisoq oqarpoq.
Siornatigut politiini isertortumik paasiniaasartutut sulisimasoq maannakkut oqarpoq tamanna ilumoortuunngitsoq. Politeeq isertortumik paasiniaasartutut sulisimasoq maannakkut akunnittarfimmi isertuussaasumi inisseqqavoq. Taanna norskit radioani tusagassiortumit apersorneqarluni oqarpoq, atuakkiortut uppernarsaatitut saqqummiussaat ilumoortuusut, tassalu isertortumik paasiniiasartut Treholtimut taamanikkut pasilliissutigineqartut ilusilersorsimagaat.
Aningaasat dollarsinik imallit pineqaatissiinermi uppernarsaatitut atorneqartut saniatigut, isertortumik paasiniaasartut atuakkami unnerluutigineqarput, Arne Treholt russit kilitsissiaattut
assiliiniarsimasutut. Arne Treholt Cypern-imi nunagisaminit qimaasutut inuuvoq, taamaattorli ulluni makkunani Oslo-miippoq pineqaatissinneqarsimasut pillugit suliassanngortitseqqiisartut aalajangernissaat malinnaaffigiartorlugu.
Arne Treholt kilitsissiatut sulisimaneranik suliaq aallarteqqinneqartussanngorpoq, Arne Treholtillu pinngitsuunini uppersarsinnaallugu, taamaassimappat.
