Suliaritittussat sivisunerusumik utaqqissariaqalissapput
Dronning Ingridip napparsimmavissuani peqqissaasunik amigaateqalernissap kingunerissavaa, pinasuartumik suliaritittussat kisimik passunneqalernissaat.
Allattoq Jaaku Lyberth
septembarip 05-at 2008 10:55
Pilatsissimasut uninngavianni siniffiit 13-it nakorsartittullu uninngaviini inissat arfinillit, matuneqartariaqassapput. Suliaritissallutik utaqqisut sivisunerusumik utaqqissariaqassapput, amerlanerulissallutillu.
Dronning Ingrip Napparsimavissuani aningaasanik 8-9 mio. koruuninik ukiup sinneranut sipaarniuteqarneq pissutigalugu, peqqissaasut paarlattaasartut, Danmarkimi namminersortunit isumaqatigiissuteqarfigineqartartut unitsinneqarput. Peqqissaasutut atorfiit 19-it amigaatigineqarput.
-Pinasuartumik suliaritittussat suliaritinngitsoornissaminnut ernummatigissaqanngillat, pinasuartumik suliaritittussat suliarineqartassapput, Mai-Britt Andersen Dronning Ingridip Napparsimavissuani peqqissaasut ningiuat oqarpoq.
