Suliaq Puisi A/S-imut tunngasoq 22-ani naammassissaaq

Eqqartuussinerup inernera Nunatta Eqqartuusisuuneranit Søren Søndergård Hansenimit decembarip ulluisa 22-anni nalunaaqutaq ulloqeqqata qeqqanut nalunaarutigineqassaaq.

Puisi A/S-imi siulersuini ilaasortaasimasut kukkunersiuisuusimasullu katillugit aningaasanik 22 millioni koruuninik Namminersornerullutik Oqartussanut taarsiinissaat suliassanngortitsisunit, tassa Namminersorlutik Oqartussanit, piumasarineqarpoq.

Taarsisuusussatut suliassanngortinneqartut inuit nuimasut ikinngillat, soorlu inuit ilaat ukuusut:

SIK-mi siulittaasoq Jess G. Berthelsen, Folketingimi ilaasortaq Lars Emil Johansen, Puisi A/S-imi direktøriusimasoq, maannalu Qaasuitsup Kommuniani imaani uuliasiornermik ataqatigiissaarisoq Hans Peder Barlach Christensen. Suliassanngortinneqartut tamarmik akisussaannginnerarlutik oqarput.

Eqqartuussivimmi suliaq novembarip ulluisa tallimaanni aallartinneqarpoq, katillugulu 20-riarluni ataatsimiittoqarluni. Suliami uppernarsaasoqarsimaqaaq, taamatullu aamma allakkatigut uppernarsaaterpassuit atorneqarsimallutik.

Puisi A/S pillugu annertunerusumik paasisaqarusukkuit, nittartakkatsinnut www.knr.gl-imut iserlutit paasissutissat amerlanerit atuarsinnaavatit.