Suli qipoqqartassiisoqanngilaq

Nunatta qipoqqartassinneqarnissamik kissaata Arfanniarneq pilugu ataatsimiititaliarsuup immikkut ittumik ataatsimiinnerani Floridami pisumi naammassillugu oqaluuserineqanngilaq. dr.dk allagaa issuarlugu knr.gl-imi ullumi siusinnerusukkut allaaserisaq kukkusuuvoq.

Ataatsimiinneq aalajangiiffiunngilaq, nuna siulittaasuutitaqartoq allallu ataatsimiinnermi peqataatitaqanngimmata. Tamanna ilaatigut pissuteqarpoq, nuna siulittaasuutitaqartoq Chile, nunap sajunnersuanik misigisaqarfioqqammertoq, aallartitaqanngimmat.

Nunatta ukiumut qulinik qipoqqartassinneqarnissamik kissaataa IWC-mi aasaru ileqquusumik ataatsimiittoqalerpat aatsaat oqaluuserineqassaaq.

Nunatta kissaataa akuersaarneqanngippat, Nunarput IWC-mi ilaasortaajunnarnissamik suli siorasaaruteqarpoq.

- NAMMCO-mi (Immami miluumasut pillugit Atlantikup avannaani nunat ataatsimiititaliarsuat, aaqqiss.) nunat ilaasortat isumaqataappata, arfernik anginernik aamma pisassiisalernissaq, tamanna tassani ikaarsaafigissallugu periafissaavoq, Piniarnermut Naalakkersuisoq Ane Hansen, Floridami immikkut ittumik ataatsimiinnermi peqataasoq, oqarpoq.

Taanna aamma oqarpoq, IWC-mik naammaginnikkunnaartut Nunatta saniatigut arlaqartut.

- Maluginiarpara, nunat arlalissuit nipi taanna anikkaat. Japanip, Norgep aamma Islandip IWC-mi ilaasortaaginarnissartik aamma nalilersortorujussuanngorsimavaat, Ane Hansen oqarpoq.