Ullumikkut aalajangiisoqarnissaa naatsorsuutigineqarpoq, aalajangersagarli qanorpiaq imaqassanersoq suli oqaatigineqarsinnaanngilaq.
Timmisartoqqusiunnaarnissaq kisimi pineqassanersoq nalunarallarpoq. Taannaannaassanngitsoq USA-p sulissutigaa, libyamiummi sakkutuujunngitsut imaaniit nunamiillu saassunneqarnissaat USA-p ernummatigaa, taakkulu upalungaarsimaffigineqarnissaat kissaatigaa.
Libyami pikitsitsisut aamma isumaqarput, timmisartoqqusiunnaarnissaq naammannavianngitsoq. Taakku piumasaraat nunarsuarmi inuiaqatigiit nunaminni ikiorsiissasut, Gadafimmi sakkutuui sakkortoorsuarnik sakkoqarnertik pissutigalugu pissaanermik tigusisimapput. Qamussuit sorsuutit qamutillillu taakku ilaatigut sakkugaat.
Libyap timmisartunit qulaanneqartannginnissaa kisiat pinnagu, aammali sakkutuut qaartartumeerisinnaanerannut upalungaarsimanissaq, Naalagaaffiit Peqatigiit oqaluuserisaat, Danmarkimi ministeriunerup Lars Løkke Rasmussenip tapersersorpaa.
- Gaddafip sakkutuuisa illuatungiliuttunut saassussinissaat pinngitsoorniarlugu timmisartoqqusiunnaarnissaq naammanngilaq, ministeriuneq nutaarsiassaqartitsivimmut Ritzauimut oqarpoq.
Libyami pikitsitsisut ilungersoqisut ikioriartornissaat pisariaqassappat, Naalagaaffiit Peqatigiit avaqqullugit taamaaliornissaq, Folketingimi amerlanerussuteqartut maanna piareersimaffigaat.