Suleqatigiittut nutaat Nuummi inissianik nutaanik 1850-inik sanaartorniartut

Tallimanngormat nutaanik Naalakkersuisoqatigeeqaliinnarani Kommuneqarfik Sermersuumi IA, Demokraatit Nalerarlu aamma suleqatigiilerput.
Charlotte Ludvigsen
Borgmesteri, Charlotte Ludvigsen kommunimut qinersinermi 1.512-init taaguunneqarluni borgmesterinngoqqippoq. Assi © : Christian Sølbeck
apriilip 21-at 2021 11:23
Nutserisoq Connie Fontain

Nuummi inissiat nutaat 1850-it ukiut arfinillit ingerlaneranni sanaartorneqassapput.

Paamiuni Tasiilamilu inissiat qulinit 15-inut ukiut qulit ingerlaneranni ukiumut sanaartorneqassapput.

Maannalu ulluunerani paaqqinniffiit aamma innunnik isumaginnittoqarfimmi siusinnerusukkut isumaginninnerit pitsaanerullutillu amerlanerulissapput.

Inuit Ataqatigiit, Demokraatit Naleqqallu Kommuneqarfik Sermersuumi ulluni qulingiluani isumaqatiginninniarnerminni qitiutitaat ilaatigut tamakkuupput.

Naleraq aatsaat siullermeertumik kommunalbestyrelsimut qinigaatitaqarpoq.

Demokraatit suleqataaqqilersut

Demokraatit IA-mut siusinnerusukkut suleqatigiinnermit 2019-imi tunuarput. Demokraatit taamani suliaq eqqartugaangaatsiartoq tassa suliaq Tasiilami meeqqat sumiginnarneqangaatisarneranik takutitsisoq pillugu illoqarfiit pingaarnersaata tunullu kommuniani suleqataanertik unitsippaat.

IA tamanna pissutigalugu kommunimi suleqateqarunnaarpoq, taamaakkaluartorli suli amerlanerussuteqarlutik.

Demokraatit maanna suleqataaqqilerput – borgmesterillu, Charlotte Ludvigsenip oqarnera naapertorlugu partiip kommunimi siuttuusarnerminni pilersaarutaat qinigaaffimmi matumani ingerlateqqinneqarsinnaapput.

AAMMA ATUARUK Sermersooq: Partiit pingasut suleqatigiinnissaminnik isumaqatigiittut

- Taamaattumik aamma qularnanngilaq ukiuni sisamani ingerlaqqinnissatsinni aamma tunngavissaalluarpoq, borgmesteri, Charlotte Ludvigsen (IA) oqarpoq.

IA, Naleraq Demokraatillu kommunalbestyrelimut ilaasortanit 19-init 13-inik qinigaatitaqarput.

Demokraatit qinigaaffiup siuliani  pingasunik ilaasortaatitaqarput, maanna marlunnik qinigaatitaqalerlutik.

Naleraq marlunnik qinigaatitaqarpoq.

- Siullertut ineqarneq, taavalu suliffeqarneq, ataavartumik sineriak tamaat isigalugu pilersinneqarnissaa pingaartissimavarput, Naleqqamit, Pele Broberg oqarpoq.

- Isumaqatigiissummi kommunitsinni najugaqarfiit tamarmik pingaartumik kommunip kangisinnerusortaaniittut, tassa Ittoqqortoormiit Tasiilarlu isumaginiarneqarput. Nuummilu ooqattaasarfeqalernissaa kissaatigaarput.

IA qinersisut affangajaannit taaguunenqartoq

Inuit Ataqatigiit kommunimut apriilip ulluisa arfernanni qinersisoqarnerani illoqarfiit pingaarnersaanni 45,1 procentinit taaguunneqarluni partiini annerpaavoq.

Siumut taaguunneqarnerpaat tulliulluni 29,4 procentinit taaguunneqarpoq, Siumulli kommunalbestyrelsimi partiini isumaqatigiissummut ilaanngitsutuaavoq.

IA-p kommunalbestyrelsimut katillugit 19-inik qinigaatitaqarnissani qulakkeerpaa. Siumut arfinilinnik taavalu Naleraq Demokraatillu tamarmik immikkut marlunnik qinigaatitaqarlutik.

Borgmesteri, Charlotte Ludvigsen 1.512-init taaguunneqarluni borgmesterinngoqqippoq.

Borgmesteri, borgmesterip tullersortaa ataatsimiititalianullu ilaasortat kommunalbestyrelsip inissisiternermik ataatsimiinnerani maajip ulluisa pingajuani pisortatigoortumik saqqummiunneqassapput.

Erseqqissaaneq: Paamiuni Tasiilamilu inissianik qulinit 15-inut sanaartorneqassasut Ilanngutassiami siusinnerusukkut allakkaluarparput. Tamanna eqqunngilaq. Isumaqatigiissut naapertorlugu illoqarfinni taakkunani marlunni inissiat qulinit 15-inut ukkumut sanaartorneqassapput.