Partiit arfineq-marluk, apeqqutit marluk: Suleqatigiissitsisut

Michael Rosing Suleqatigiissitsisut siulittaasuat ullumikkumit aallarniutigissavarput.

Nunatsinni maanna suna unammillernarnerpaanersoq apeqqutigaarput.

- Nunatsinni inuuniarnikkut ajornartorsiutit maannakkut unammillernarnerpaapput. Tulliattut, meeqqat atuarfiini ajornartorsiutit pingajuattullu aalisarnernerup naalagaaffimmiillu tapiissutit avataatigut isertitaqannginnerput unammillernarnerpaallutik. Inuuniarnikkulli ajornartorsiutit ajornartorsiutaanerpaapput. Inuppaasuarnik inuunermini anniaateqartunik ulikkaarpugut iliutsitsinnut tamanut sunniuteqarput. Inuit suliffimminnik paarsisinnaanngippata aningaasaqarnermut napatilersinnaanngilarput. Inuit inuuniarnermikkut ajornartorsiuteqarpata meeqqat atuarfiannik naammassinnitsissinnaanngilagut. Qanoq iliuuseqarsinnaavallaanngilagut. Taamaammat inuiaqatigiinni ajornartorsiutit aaqqiiviginissaat pingaarnerpaarpaavoq, Suleqatigiissitsisut siulittaasuat, Michael Rosing, taama oqarpoq.

Suleqatigiissitsisut tamanna qanoq iliuuseqarfiginiarpaat?

- Tassani isumaqarpunga ikiortissarsiortariaqartugut. Naalagaaffeqatigiinniilluta oqaatigisariaqarparput, ikiorsiissutigineqarsinnaasullu tamaasa qujaruttariaqarpagut. Tassani aallartittariaqarput, taamaanngippat iluatsittoqarnavianngilaq. Danmarkimi isumalluutinik ulikkaarpoq, taakkulu inuiaqatigiinni ajornartorsiutit qanoq iliuuseqarfiginissaat ilisimasaqarfigaat, sulisussaqartippaat aningaasassaqartillugillu. Taamaammat inuiaqatigiinni ajornartorsiutitta aaqqiiviginiarneranut nammineq aningaasaatitta ilaat tassunga saatissavagut, taava aamma naalagaaffeqatigut ornissavagut oqarlutalu, maani ataatsimoorussamik ajornartorsiuteqartugut ikiorneqarnissarpullu kissaatigaarput, ilisimasaqalerusuppugut, inunnik sullissisussanik isumalluutinillu perusuppugut, Michael Rosing taama oqarpoq.
 
Partii nutaaq apeqqutip assinganik aqagu apeqquteqarfigissavarput.