Suleqatigiinnissarput pisussaaffigaarput
Nunat Avannarliit Siunnersuisoqatigiiffianni præsidentip tullersortaa, svenskeq, Christina Gestrin, issittumi inatsisartut, Folketingimilu ilaasortat, Alaskami Fairbanksimi sapaatip akunnerani qaangiuttumi ataatsimeersuarmata taama erseqqissaavoq.
-Issittumi nunani inatsisartunut Folketingimilu ilaasortaasugut suleqatigiinnissarput pisussaaffigaarput, nunarsuarmi silap kiatsikkiartornerata kinguneri nunani immanilu avannarlerni qanoq sunniuteqarnersut Københavnimi ataatsimeersuarnermi salliutissallugit, Nunat Avannarliit Siunnersuisoqatigiiffianni præsidentip tullia oqalugiarnermini oqarpoq.
-Silap kiatsikkiartornera qanorluunniit iliorluta unitsinniartariaqarparput, silallu pissusaata allanngoriartornera Issittumi nunap inuiisa peqqissusaannut inuunerminnilu atugaannut qanoq sunniuteqarnersoq paasiniartariaqarparput, Christina Gerstin oqarpoq.
Ataatsimiinnermi, Folketingimut ilaasortaatitatta, Juliane Henningsenip aamma peqataaffigisaani, issittup imartaani angalasarneq, nukinnik atuineq peqqissutsimullu tunngatillugu ajornartorsiutit, aamma apeqquteqaateqarfigineqarput.
