Suleqatigiilluni isumaginninnermut aningaasateqarfik atulerpoq
Isumaqatigiissuteqarnerup kingorna maannamut aningaasaateqarfiup aningaasanut pisariaqartitaanut katersinermut atorneqarput.
Aningaasaateqarfiup siunertaraa KNI-mi sulisut, taakkualu ilaqutaasa, nappaammik perulunnartumik eqqorneqartut, sivisunerusumillu napparsimmavinni Danmarkimiittuni uninngasariaqartut, aningaasatigut tapiiffigalugit ikiorneqarnissaannut.
Aningaasaateqarfik iluaqutigalugu ilaquttat nappaammik perulunnartumik eqqugaasut tikeraarnissaannut tapiissuteqartoqarsinnaavoq, tassungalu atatillugu aningaasartutinut allanut aamma tapiissuteqartoqarsinnaalluni.
KNI-mi sulisut, nunatsinni Danmarkimiluunniit napparsimmavinni toqusut, taakkulu ilaqutaasa, angalanerinut angallanneqarnerinullu aningaasaateqarfik aamma tapiissuteqartassaq.
SIK-p KNI-llu aningaasaateqarfimmik pilersitsinerat isumaginninnikkut akisussaaffeqarnermik piumassuseqarnermik takutitsineruvoq, tusagassiuutinut nalunaarummi allassimavoq.
Nalunaarutigineqarpoq Isumaginninnikkut Aningaasaateqarfiliornissamik isumassarsiaq suliffeqarfinnit, Namminersorlutik Oqartussanit pigineqartunit, namminersortullu inuussutissarsiutilinnit allanit, ilassilluarneqarsimasoq. Taakku ilaat arlallit aningaasaateqarfiliornissamik isumaqatigiissuteqarfigineqareersimapput. Ingerlatsiviit suliffeqarfiillu aqqi kingusinnerusukkut nalunaarutigineqarumaartut aamma erseqqissaatigineqarpoq, suliffeqarfiit taakku Isumaginninnikkut Aningaasaateqarfimmut aningaasanik tapiissuteqarsinnaaleriarpata, SIK-ip siulittaasua, Jess G. Berthelsen, oqarpoq.
