Sukumiinerusumik naalakkersuisut aaqqiiniarusupput

Naalakkersuisut Qaanaamilu kommunalbestyrelse Qaanaami innuttaasunut ippassaq arfininngornermi maajip 19-ni ataatsimiisitsipput. Innuttaasunik ataatsimiisitsinermik aammaapput Qaanaap borgmesteria Jens Danielsen Naalakkersuisullu siulittaasuat Hans Enoksen.

Timersortarfimmi ataatsimiisitsinermut akunnerit pingasut sinnerlugit ingerlanneqartumut Qaanaarmiut 200-nit ikinnerunngitsut peqataasut borgmesterimit Jens Danielsen-imit tikilluaqquneqarput, Naalakkersuisullu siulittaasuat Hans Enoksen ima oqarpoq:

- Nuannaarutigaara taamak amerlatigisut maanga takkummata, aammalu ippassaq tikilluaqquneqarnerput, ersarissumik sakkortuumik nipilik assut qujassutigaarput. Takusinnaavarput, taamaaliornitsigut isummat ersarissut, oqaloqatigiissinnaanngortugut isummersinnaanngortugullu killeqanngitsumik. Ajornartorsiutit poortorlugit ajornartorsiutinik aaqqiiniarnissaq ajornarpoq. Taamaammat naalakkersuisuni aalajangersimavut imigassaq matuneqarallartariaqartoq. Taava sukumiissumik ingerlariaqqinnissarput eqqartorsinnaanngussavarput, Hans Enoksen oqarpoq nangillunilu:

- Naalakkersuisut aaqqiiniarnissatsinnut ima soqutiginnitsigivugut, allaat naalakkersuisut pingasuulluta maanngarsimalluta, naak allarpassuarnik pingaarutilinnik suliassaqaraluarluta.