Sukkunut akitsuut juullimi niuffannikinnerulersitsivoq
Pisiffimmi tuniniaanermut pisortap Niels Andersenip juullimut niuernermi isertinneqartut iluarisimaarpai.
- Ukiup siulianut sanilliutissagutsigu ukioq manna juullernissaanut niuerneq ajunngitsorujussuartut nalilerparput, Niels Andersen KNR-imut oqarpoq.
Kaaviaartinneqartut qaffassimapput, Pisiffimmili tuniniaanermut pisortap kaaviaartinneqartut qanoq amerlatiginerat oqaatigiumanngilaa. Taamaakkaluartoq Pisiffiup niuertarfiini tamani juullernissaanut niuffanneq ingerlalluarsimavoq.
Atortut elektroniskiusut juullimi tunissutaalluarput
Assersuutitut taaneqarpoq atortut elektroniskiusut juullimi tunissutissatut pisiarineqarnerpaasimasut.
- Pinnguaatit Playstationit oqarasuaatit angallattakkat - siutequtit tusanaarutit tunisaalluarput, Niels Andersen oqaluttuarpoq.
- Kalaallit filmiliaat DVD-nngorlugu saqqummersinneqartoq quilertarnartuliaq "Unnuap taarnerpaaffiani" tunisaasorujussuuvoq, taannalu tupaallatigivarput, Niels Andersen oqaluttuarpoq.
DVD-it 500-nik sinneqartut tunineqarput.
Sukkunut akitsuutip marloriaammik qaffassimanera pissutigalugu juullernissaanut mamakujuttunik pisisut ukioq manna ikinnerusimasut, Niels Andersen naliliivoq.
- Sukkunut akitsuutit qaffannerisigut mamakujuttunit tunisat annikinnerisimapput, Niels Andersen oqarpoq.
Brugsenimi juullimut tunisat amerlinerusimapput
Kalaallit Nunaanni Brugsenip juullimut niuffannermi kaaviaartitai qaffariarlaarsimapput.
- Ukiup siuliinut sanillullugu tunisat 5 procentinik qaffariarsimapput, Brugsenimi pisortaq, Susanne Christensen KNR-imut oqarpoq.
Brugsenilli niuertarfii illoqarfinni tamani ingerlalluartutut taaneqarsinnaanngillat.
Brugsenini pisortap assersuutitut taavaa Brugseni Nanortalimmi kaaviaartitat ukiuni kingullerni ikiliartuinnavissimammata, tamatumunngalu pissutaasoq innutaasut illoqarfimmit allamut ukiuni kingullerni sisamani tallimani nuuttarsimanerat kaaviaartitat ikileriarnerannut pissutaasoq.
Mamakujuttunik tunisat ikinnerupput
Sukkunut akitsuutip qaffanneqarnera Brugsenini malugineqarpoq. Mamakujuttunik tunisat ikinnerusimasut Susanne Christensen oqaluttuarpoq.
- Mamajukujuttunit tunisat ikinnerusimasut takusinnaavagut - pisisartut mamakujuttunik pisinissaminnut sipaarsimapput taakkua akitsorsimammata, Susanne Christensen oqarpoq.
KNI-mi juullimut niuffanneq ingerlalluarsimavoq
KNI-p ingerlataani Pilersuisup nunaqarfinni illoqarfinnilu mikinerusuni pisiniarfiinni juullimi niuffanneq ingerlalluarsimavoq, KNI-ip pisortaa Finn Fabricius taama KNR-imut oqarpoq.
Kalaallit Nunaata avannaani kaaviiaartinneqartut ingerlalluartorujusuupput. Nioqqutissanik piserussuseqarluarnermut pissutaavoq aalisakkanik tunisineq ingerlalluarmat.
- Pisisartugut aningaasaateqarnerulersimapput assersuutigalugu qamuteralaat snescooterit ukiup ingerlanerani tunineqarluarsimapput.
Pilersuisumi pisisartut juullernissaanut mamakujuttunik pisisut ikinnerusimapput sukkunut akitsuut politikerinit marloriaammik qaffanneqarmata.
- Juullimut mamakuttunik tunisat suli naatsorneqanngimmata tunisat qanoq ikileriarsimatiginersut suli paasinngilarput, KNI-imi pisortaq, Finn Fabricius KNR-imut oqarpoq.
