Sukasaatitorsimanerminik nassuertoq

Tour de Francertut ippassaq naammassipput. TV-kkulli timersortunik isiginnaarusuttut timersortartunillu anngiortumik sukasaatitorsimasunik paasisaasunik tusarusuttut utaqqingaartariaqanngillat. Tallimanngorpammi aggustip arfineq pingajuanni Kina-mi illoqarfiit pingaarnersaanni, Beijingimi OL-ertut aallartissapput.

Danmarkimi mountainbikenik pissartaq 28-nik ukiulik, Peter Riis Andersen, OL-imut ilaasussaagaluartoq, misissortikkami EPO-mik sukasaatitorsimalluni paasisaasimanini ullumi nassuerutigaa. Taamaalilluni Peter Riis Andersen Danmarks Idrætsforbundimit Olympiademut ilaaqqusaajunnaarpoq.

KNR-imi aallakaatitassanik aaqqissuisut nalunaarutigaat Olympiademi unamminerit unnuat tamaasa KNR-TV-kkut aallakaatinneqartassasut. Tassa Kina-mi nalunaaquttap nikinganera pissutigalugu, unnukkut nalunaaqutaq aqqanermiit aqaguani ullukkut ataatsip tungaanut unamminerit aallakaatinneqartassapput. Unnuakkulli isiginnaarsinnaanngitsut malinnaasinnaaniassammata, unnuit tamaasa unamminerit eqikkarlugit aallakatineqartassapput.