Suiaqatinoortut nuna tamakkerlugu peqatigiiffittaartut

LGBT Qaamaneq. Arnaqatinoortut, anguteqatinoortut, angutinoorlutillu arnanoortut kiisalu arnat angutitut imaluunniit angutit arnatut inunngorsimasut nuna tamakkerlugu peqatigiiffittaavat Nuummi ippassaq ataatsimeersuarmat taama taaguuserneqarpoq.
Allattoq Karsten Sommer, Simon Uldum
aggustip 18-at 2014 07:13

Nuna tamakkerlugu peqatigiiffimmi siunertarineqartut tassaapput ataqatigiinneq, inooqatigiilluarnissaq katerisimaarluarnissarlu.
 
Peqatigiiffittaaq ilaasortat ataatsimoorfittut atorluassagaat LGBT Qaamanermit neriuuutigineqarpoq, tamanna amigaatigineqarsimammat, peqatigisaanilli aamma erseqqissaatigineqarpoq nuna tamakkerlugu peqatigiiffik tamanut ammasuummat, arnaqatinoortunut anguteqatinoortunullu ilaqutaasut, ikinngutaasut suleqataasullu atertik taanngikkaluarlugu peqatigiiffiup suliaanik tapersersuisinnaallutik.
 
Siulersuisunngortut aamma neriuutigaat, sinerissami illoqarfinni nunaqarfinnillu anguteqatinoortut arnaqatinoortullu attaveqaqatigiinnissaannut peqatigiiffik periarfissiisinnaassasoq. Tamannalu peqatigiiffiup Facebookimi qupperneratigut LGBT Qaamaneq-kkut imaluunniit nittartagartaavatigut www.lgbt.gl maanna suliarineqaleruttortukkut pisinnaavoq.

AAMMA ATUARUK Gay pridet tallimassaat piareerpoq

Nunatsinni anguteqatinoortut arnaqatinoortullu pillugit Hjalmar Dahlip atuakkiaani nutaami - ukiormanna saqqummersumi - ”Inuugatta” nunatsinni suiaqatinoortut inuunerat siullerpaamik erseqqissarneqarpoq. Suiaqatinoortuunasorigaanni suiaqatinoortunik allanik attaveqaqateqarsinnaanerup pingaaruteqassusaa atuakkami tassani naqissuserneqarpoq.
 
Peqatigiiffittaarlu tamatumunnga periarfissaqartitsissaaq.
 
Tina Egede LGBT Qaamanermi siulittaasunngorpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk