Suiaqatiminoortartut katissinnaanissaannut inatsisip atuutilernissaa kinguaqqittoq

Suiaqatiminoortartut katissinnaanissaannut inatsisip Folketingimit akuersissutigineqarnissaa, taamaalilluni ukioq manna oktobarip aallaqqaataanit atuutilersinnaaniassammat, Inatsisartut Folketingimut innersuussutiginikuugaluarpaat.
 
Inatsisissarli Folketingimi akuersissutigineqarnissaa aasaanerani sulinngiffeqartoqartussaanera pissutaalluni kinguartinneqaratarsinnaavoq. Folketingimi sulineq pisortatigoortumik oktobarimi marlunngornerit siullersaanni aallartittarpoq, suiaqatiminoortartullu katissinnaanissaat pillugu inatsisissaq oktobarimi aatsaat akuersissutigineqarsinnaassagunarpoq.

AAMMA ATUARUK Suiaqatigiit katittarnerat pillugu inatsit akuersissutigineqartoq

Inatsisissatut siunnersuut Folketingimi naammassillugu juunip ulluisa sisamaanni oqallisigineqartussaagaluarpoq, Folketingimulli qinikkat oktobarimi sulilerpata aatsaat oqallisigineqarsinnaassalluni.
 
Inatsisissap taamaasilluni ukioq manna oktobarip aallaqqaataani atuutilersinnaanissaa taamaammat ilimananngilaq.