Suharto ullumi ilisaavoq
Suharto 1998-imi naalakkersuisutut tunuartariaqarnermi kingorna, naalagaaffiup aningaasaataanik dollarsit milliuunit untritillit arlallit nalinginik anngiortumik tigusisimanerarlugu unnerluutigineqarpoq. Suhartop ilaqutaasalu aningaasaataat ullumikkut eqqoriarneqarput 76 milliardit 177 milliardi koruunillu missaaniissasut. Suharto suli eqqartuunneqarani, sulili unnerluutigineqarluni, toquvoq. Suhartop kingoraartaa, præsident Susilo Bambang Yudhoyonop ullumi Naalagaaffinni Peqatigiinneersut naalagaaffiit 100-t sinnerlugit sinniisaat, siunertaqapilulluni akiliisarneq akilersittarnerlu pillugit Indonesiami ataatsimeersuartippai. Yudhoyono 2004-mi præsidentinngorami Indonesiami aningaasatigut pinerluttarneq akiorniarlugu suliniuteqarneraraluartoq suli siunertaqapilulluni akilersittarneq atugaaqaaq. Nunanili tamani aningaasatigut pinerlunnernik misissuisartut kattuffiata, Transparency Internationalip nalunaarsugai malillugit suli Indonesia nunat aningaasatigut pinerluffiunerpaat ilagaat, tassa nunani 179-ini 143-tut inissinneqarami. Indonesiami kisermaassilluni naalakkersuisuusimasup eqqartuunnneqarsimannginnera, aningaasaaterpassuisaluunniit ilaannaasa naalagaaffimmut utertinneqarsimannginnerat, nunatut unneqqarissumik ingerlanneqartutut isigineqarnissamut iluaqutaanngilluinnarput.
Transparency Internationalip nalunaarsugai malillugit Somalia aningaasatigut pinerluffiunerpaavoq. Kalaallit Nunaat aningaasatigut pinerluttarneq pillugu nalunaarsuiffinni Danmarkimut akuliunneqartaraluartoq, periuseq taanna maanna qimanniarneqarpoq.
