Mobildatanut attavik atuerujussuarnermit artorsinneqartoq

TELE-POST tusagassiuutinut allalluni taama nalunaaruteqarpoq, tassanilu ilanngullugu neriorsuilluni pitsanngorsaatissanik neriunaateqartoq.

Atuisartut mobiliminni datamik atuinerat qaffakkiartupiloorpoq, teknikkikkullu atortut nutaannginnerit malinnaajuaannarsinnaasanngittut, TELE-POST-imi attaveqaqatigiinnermut pisortaq Arnakkuluk Jo Kleist allappoq.

- Nunaqarfippassuit illoqarfiillu minnerusut ukiut qulit qaangerlugit mobilinut attaveqaat ataaseq atugarivaat. Datamik annertuumik atuilernerujussuaq 2G-mut aammalu 3G-mut attaveqaatitsinnut nutaanngililersunut artukkeeqaaq, aasamulli illoqarfinnut nunaqarfinnullu tamanut 4G-mut attaveqaammik siaartiterineq aallartissavarput, Teknikkimut IT-mullu qullersaq Jonas Hasselriis oqarpoq.

2G-mut aamma 3G-mut naleqqiulluni Kalaallit Nunaanni 4G-mik kiffartuussissuteqarneq silarsuarmi sukkanerit ilagaat teknologiilu taanna ukiut tulliuttut marluk ingerlaneranni illoqarfinnut nunaqarfinnullu tamanut siaarneqassaaq.

Upernaaq manna suliniutip Mobile First-ip misilerarneqarnera siaartiterneqarneralu illoqarfinni nunaqarfinnilu siullerni aallartinneqassaaq, 2018-inillu ingerlanerani aamma suli siaarsisoqaqqissasoq TELE-POST neriorsuivoq.