Storm Ludvigsen ilinniartuullunilu qinikkatut sulissaaq
Storm Ludvigsen ilisimaneqalerpoq 2007-mi Kommuneqarfik Sermersuumi ikaarsaariarnermi ataatsimiititaliamut qinigaammat. Nuannaarnerli qinigaasinnaanermut ataatsimiititaliamit taamaatitinneqarpoq, taakku 46-nik ukiulik eqqaasimmassuk pineqaatissinneqarsimanermi qaangiunnissaanut ukiup affaa suli amigaatigigaa.
Nuummi angerlarsimaffeqanngitsut orniguttarfiannik nakkutilliisumut maanna qinigaasinnaanera iluatsissannguatsiarpoq, kisianni Stormip pilersaarutini allamut sangutippai.
- Imigassamik ajornartorsiutilinnut katsorsaasutut Frederiksbergcenterimi ilinniarnissamut siornatigut pingasoriarlunga qinnuteqartarpunga, kiisami qanittukkut akuerisaavunga. Periarfissaq taama pitsaatigisoq qatangiinnartinnianngilara, taamaattumik ilinniarnissara aallartinniarpara, naak Inatsisartunut qinigaagaluarlunga, Storm Ludvigsen oqarpoq.
Isumaqarpoq, allarpassuartulli, inunnik ilinniarsimasunik pisariaqartitsisoqarluinnartoq.
- Kiisami periarfissaqalerpunga ilisimasaqarfigisannik ilinniarnissamut, tassalu atorluinermut tunngasumik, Storm Ludvigsen oqarpoq.
Storm Ludvigsen radioavisimut ilisimatitsivoq ilinniarnini Danmarkimi septembarip aallaqqaataani aallartissasoq nunatsinnullu novembarimi uteqqikkumaarluni.
Imigassamik ajornartorsiutilinnut katsorsaasunngorniarneq ukiup aappaa avillugu sivisutigisarpoq, piffissallu annersaani Nuummiinnissani naatsorsuutigaa.
