Stoltenberg Ukrainep NATO-mut ilaasortanngorsinnaanissaanik piffissaliinianngitsoq

Ukrainep nunat killiit illersoqatigiiffiannut NATO-mut ilaasortanngorsinnaanissaa nunat NATO-mi ilaasortat ammaffigaat. Ukrainelli ilaasortanngorsinnaanissaanut suli piffissaliisoqanngilaq.

Stoltenberg nunat NATO-mi ilaasortat nunanut allanut tunngasunut ministeriisa Oslomi ataatsimiinneranni piffissaliinianngilaq. Ukrainep Ruslandimut sorsunnermi ajugaanissaanut tapersersuinissaq maannangaaq pingaarnerusoq, Stoltenberg oqarpoq.

NATO-mili ilaasortanngorsinnaanissamut neriorsuuteqartoqaannarnani allatut aamma iliortoqassasoq Ukrainep piumasaraa, nunallu Europap kangisissuaniittut matumani ilaatigut tapersersuillutik. Ilaasortanngornissamut piffissaliisoqarnissaa kissaataavoq.

Apeqqulli taanna nunat NATO-mi ilaasortat akornanni avissaartuutsitsivoq. NATO-mut qaqugu ilaasortanngortoqarsinnaanissaa assersuutigalugu USA-p Tysklandillu itinerusumik suli oqaaseqarfigerusunngilaat. Ukrainemi NATO-mut ilaasortanngussappat nunat NATO-mut ilaasortat Ruslandimut sorsoqataasariaqalissapput.

Ukraine Ruslandimut sorsutsillugu NATO-mut ilaasortanngorsinnaanngitsoq Jens Stoltenbergip erseqqissaatigisareerpaa. Ukrainemi NATO-mut ilaasortatut nunanit NATO-mut ilaasortanit illersorneqartariaqassaaq, taamalu Ruslandimut toqqaannartumik sorsuttoqalissalluni.