Stockholmimi qaartoqartoq
Stockholmip eqqaani qimuttuitsut unittarfianni sapaammi qaartoqarpoq angullu ataaseq ajunaartoq, Stockholmimi politiit nalunaarput.
januaarip 07-at 2018 12:22
Unittarfimmi Vårby Gårdimi danskit nalunaaqutaat malillugu aqqanernup missaani qaartoqarpoq, nutaarsiassaqartitsivillu Ritzau naapertorlugu angut ataaseq ajunaarpoq arnarlu ataaseq ikiligaalluni.
Angut ajunaartoq 60-inik ukioqarpoq ilagisaalu arnaq 45-nik ukioqarluni. Angut napparsimmavimmukaanneqareerami toquvoq.
Stockholmip politiivi naapertorlugit angut nunamit tigusaqarsimavoq tigusaalu qaarpoq.
Qaartitsinermut suna pissutaanersoq suli naluneqarpoq.
Qaartartunik immikkut ilisimasallit qimuttuitsut unittarfiat isumannaallisaleruttorpaat. Svenskillu nutaarsiassaqartitsivii assigiinngitsut naapertorlugit qaartoq tassaasimasinnaavoq qaartartoq miloriuttagaq håndgranateq.
Politiilli tamanna oqaaseqarfiginngilaat.
/ritzau/
