Per Stig Møllerip Myanmarimi pisut uissuummissutigaat

Danmarkimi nunanut allanut ministeri, Per Stig Møller avataaniit ikiuiartortut pisortanit iseqqusaannginnerat pillugu uissuumminerarpoq.

Per Stig Møllerip Myanmarimi sakkutuut naalagaat, kisermaassillutik naalakkersuisuusut, pissusilersuutaasa sakkortoqataanik iliuuseqarfigeqqullugit nunat tamat kaammattorpai.

Sakkutuut naalagaat naalakkersuisuusut, innuttatik ajunaartut amerliartuinnartut, ikiuiniartunik killeqarfimmi piareersimasunik nunamut isertitserusunnginnerat ingasappallaaqaaq, Per Stig Møller oqarpoq. Naalagaaffiillumi Peqatigiit sakkutuut naalagaat avoqqaaralugit nunamut pilersuineq unitsippaat. Per Stig Møllerip Naalagaaffiit Peqatigiit pisortaat, Ban Ki Moon, qanoq iliortoqarsinnaanera pillugu marlunngorpat oqaloqatigissamaarpaa. Per Stig Møllerilu isumaqarpoq sakkutuut naalagaasa nunamut killeqarfiit ammarniannginnarpatigit sakkortuumik qanoq iliuuseqarfigisariaqalersut.

Myanmarimiit uuliap avammut tuniniakkap pisiariumajunnaarnera qanoq iliuuserisinnaasat ilaattut Per Stig Møllerip taavaa, eqqaasaqarsinnaannginnerarporlu qanga nunami naalakkersuisut innuttamik ikiorserneqarnissaannik akornusersuisoqarneranik. Sulilu aarlerinartut qaangiutingillat, Naalagaaffiimmi Peqatigiit silasiorfiannit nalunaarutigineqarpoq sapaatip akunnerata tulliani Myanmarimi sialussuaalissasoq.

Silassamik nalunaarutit naapertorlugit kiattumi sialussuartarneratut pingasunngorpat sialussuaassaaq, sakkortuumillu sisamanngorpat tallimanngorpallu sialliinnarallassalluni.