Per Stig Møllerip Ilulissani isumaqatigiissut naatsorsuutigaa

Ilulissani maajip qaammataani isumaqatigiissut naapertorlugu naalagaaffiit Qalasersuup eqqaani killeqarfissaat Naalagaaffiit Peqatigiit ataanni ataatsimiititaliamit aalajangersaaffigineqassapput. Isumaqatigiissullu suli atuuttoq naatsorsuutigalugu nunanut allanut ministeri, Per Stig Møller oqarpoq. Killeqarfiliinissat pillugit Russit inatsiseqalerniarnerat killeqarfiliiniarnermi qanoq piumasaqaateqarnissaannik imaqassasoq, taakkualu Naalagaaffiit Peqatigiit allaffeqarfiannut tunniuttariaqassagaat, Per Stig Møller oqarpoq.

- Uagut aamma sukkut killeqarfeqalernissatsinnut piumasaqaateqartussaavugut, naalagaaffiillu killeqarfigilerumasaat naapertorlugit piumasaqaataat Naalagaaffiit Peqatigiit iluanni ataatsimiititaliamit inissitsiteqqissaarneqartussaapput. Imaangitsoq qanga periuserineqartartutut sorsunnikkut aalajangersorneqassasut, periutsit tamakku ullutsinnut tulluarunnaarnikuupput. Kikkut siulliullutik sumut pinersut, kikkut sumi erfalasulernersut naapertorlugit, sorsuuteeqqanillu inissitsiterinikkut killeqarfilerngusaattarneq ullutsinnitut atugartuussuseqartilluta pissusilersuutigineqarnissaat takorloorsinnaanngilara, Per Stig Møller oqarpoq.

Silap kissakkiartornerata kinguneranik siku aakkiartupiloortillugu Qalasersuup eqqaani killeqarfilersuinissaq tuaviornarsigaluttuinnarpoq. Qalasersuup eqqaa sikuerulluni angallavigineqarsinnaalermat pissuussutit, tassa uulia gassilu annertooq, qalloriaannanngulermata naalagaaffiit sukkut killeqarfeqalernissaat pissanngatigineqaraluttuinnarpoq.