Per Stig Møllerip ataatsimiinnissami oqariartuutiginiarneqartut akerlerilluinnarpai
Islamisiortut Hizb-ut-Tahririkkut ataatsimiissinnaanissaat pillugu Den Sorte Diamantimi inimik attartorsinnaanissaat eqqarsaatigilluaqqaartariaqarparsi, Per Stig Møller oqarpoq.
Hizb-ut-Tahririp ataatsimiinnissamut qaaqqusinermini assitaliivoq, danskit, svenskit, norgimiullu sakkutuuisa illerfii ilaatigut assitaliullugit.
Nunat allamiut sakkutuuinik sapinngisamik amerlanerpaanik toqoraasoqarnissaa qaaqqusissummi ilaatigut aamma kajumissaarutaavoq.
- Danskit sakkutuuinik toqoraasoqarnissaanik kajumissaariitigaluni Hizb-ut-Tahririp ataatsimiigiaqqusinera akerlerilluinnarpara. Naalagaaffiit Peqatigiinni isumaqatigiissut tunngavigalugu Afghanistanimi sakkutuuleeqataavugut, Per Stig Møller oqarpoq, taamatullu oqariartuuteqarluni ataatsimiigiaqqusisoqarnera danskisut innuttaasusilinnit qoqassiilluni saassussinerusoq oqaatigalugu.
Per Stig Møller kulturministeriuvoq Den Kongelige Bibliotekilu aamma akisussaaffigalugu, taamaammat Hizb-ut-Tahririp tassani ataatsimiissinnaanissaanut akuersinermut tunuliaqutaasut nassuiaateqarfigineqarnissaat taassuma kissaatigaa.
Ataatsimiinnissap taamaatiinnarneqarnissaa, Dansk Folkepartip siulittaasuata Pia Kjærsgaardip piumasaqaatigaa, Per Stig Møllerilli tamanna piareersimaffiginngilaa:
- Ataatsimiinnissamut inniminniisarnerit isumagineq ajorpakka. Den Kongelige Bibliotekip tamanna isumagisassaraa, ataatsimiissinnaanissarli pillugu nassuiaateqartoqarnissaa kissaatigaara, Per Stig Møller oqarpoq.
Hizb-ut-Tahrir "Afghanistan: De skandinaviske regeringer i USA's tjeneste"-mik qulequtserlugu Den Kongelige Bibliotekimi januaarip 21-ani ataatsimiigiaqqusivoq.
