Per Stig Møller Savalimmiunut tikeraalerpoq

Savalimmiut politikkikkut nunanut allanut pisinnaatitaanerat, aamma EFTA-mullu ilaasortanngorusunnerat Per Stig Møllerip tikeraarnerani eqqartugassanut ilaapput. Danmarkimi nunanut allanut ministerip Lagmand Joannes Eidesgaard ualeru ataatsimeeqatigissavaa.

Savalimmiuni nunanut allanut tunngassuteqartut Danmarkimi naalakkersuisunut atasuupput. Illuatungeriilli ungasinngitsukkut nutaamik isumaqatigiissusiorput, nunanut allanut naalagaaffiullu isumannaatsuunissaanik politikkimut tunngasut Savalimmiut namminneq isumagisarilissagaat. Isumaqatigiissut taanna Danmarkimi Folketingimit Savalimmiunilu Lagtingimit akuerisaavoq, taamaammat nunarsuaq tamakkerlugu isumaqatigiinniarnerit Savalimmiunut immikkut soqutiginaateqarsinnaasut Savalimmiuniit peqataaffigineqarsinnaapput.

Savalimmiuniit tunisaalluartut – aalisakkat – Europamut tunineqartarmata – Savalimmiut EU-mut attaveqarnerat Per Stig Møllerip Savalimmiunut tikeraarnerani aamma eqqartorneqartussaapput.

Savalimmiut Kalaallit Nunaattulli EU-mut ilaasortaanngilaq. Savalimmiulli EFTA-mut ilaasortanngorusupput, Danmarkimili nunanut allanut ministerip tikeraarnerani pilersaarutit tamakku oqaluuserineqassapput.