Per Stig Møller misissuisoqarnissamik akuersivoq
- Siullermik qallunaat naalakkersuisuisa erseqqissaassutigivaat, tamakkununnga tunngatillugu ilisimasaqanngitsut, Aleqa Hammond Per Stig Møllerilu oqaloqatigeereerlutik paasisaminik oqarpoq. Taamaattorli.
- CIA isertuussillutik Kalaallit Nunaat aqqutigalugu timmisartuussisarsimassappata, qallunaat naalakkersuisa suliassaq ingerlanniarpaat aammalu nunatsinnut susoqarneranut tunngatillugu nalunaarusiussallutik, Aleqa Hammond oqarpoq.
Naalakkersuisut piumasaqaateqarput suliaq pimoorullugu pingaartillugulu suliarineqassooq misissorneqassallunilu. .
-Uani pasinartuliuutigineqartoq, Kalaallit Nunaat isertortumik timmisartuussisarnerni ajortumeerinianik angallassinermut atorneqartarsimanera, uppernarsarneqartutut uani piviusulersaarusiami ittoq, ilumoornersoq misissortariaqarpaat, Aleqa Hammond oqarpoq
-Kalaallit Nunaat taamatut timmisartuussinerni atornerlunneqartartutut inissisimasoq nalunaarusiarineqartariaqarpoq.
Folketingimi illuatungiliuttut allanulluunniit attuumassuteqanngitsumik misissuisoqarnissaa piumasaraat, tamannalu naalakkersuisunit isumaqatigineqarpoq.
- Nuna manna inuuffigisarput torersumik ataqqeqatigiittumillu Naalagaaffiup iluani ingerlatsiviussaaq, aammalu qallunaat naalakkersuisuisa CIA nunarput timmisartuussisarnikkut atuisarneranik ilisimasaqarfigisimassappassuk, Itillimi isumaqatigiissut maj 2003-meersoq unioqqutinneqarsimassooq, Aleqa Hammond oqarpoq.
Itillimi isumaqatigiissut naapertorlugu Danmarkimi naalakkersuisut nunanut allanut sillimaniarnermullu tunngassunik apeqqutini, Kalaallit Nunaat pinngitsoornani tusarniarneqartassaaq.
CIA-mut tunngatillugu nalunaarusiaq qaqugu Naalakkersuisunit tiguneqassanersoq ilisimaneqanngilaq, taamaattorli suliaq sukkanerpaamik suliarineqassasoq, Aleqa Hammond aamma oqarpoq.
Danskit nunanut allanut ministeriat Per Stig Møller Kalalallit Nunaannut salluliorsimannginnerarluni oqarpoq. Amerikamiut aperinikuuvakka, isumaqarpungalu nunat assigiinngitsut akornanni isumaqatigiissut ataqqigaat, taamaattumillu sallusutut oqaatigineqarsinnaanngilanga, Per Stig Møller aviisimi politikenimi taamatut issuarneqarpoq. Paasissutissat pigisakka Kalaallit Nunaannut ingerlateqqinnikuuakka, taava salluliuutikka naak ? Per Stig Møller aperivoq.
