Per Stig Irakimi
Danskit nunanut allanut ministeriata Per Stig Møllerip Irakimut tikeraarnerani illoqarfiup ilaani niuffaffimmi qaartartut biilinut inissinneqarsimasut qaartinneqarmata inuit 91-it toqutaapput arlalissuillu ikilersiterneqarlutik.
Nunat allat Irakimut sakkutuulliussaasa qanoq angerlarartinneqarnissaat Danskit nunanut allanut ministeriata Per Stig Møllerip Irakimilu naalakkersuisut oqaloqatigiisutigaat.
Ataatsimiinneq naammassimmat Irakimi naalakkersuisut siulittaasuat Al- Maliki oqarpoq danskit sakkutuui qanittukkut angerlartinneqarsinnnaasut.
Amerikamiut Irakimik qaqugu qimatsinissartik pillugu sapaatip akunnerata tulliani saqqummiussaqassamaartut Maliki aamma oqarpoq. Irakimiulli qaqugu qimanneqarusunnerat apeqqutaalluinnarpoq.
Irakimi demokratiimik tunngaveqarluni aqutsisoqalernissaanut ikiuutissallutik aninissartilli aalajangerneqarpat anisariaqassallutik Per Stig Møllerip erseqqissaatigaa.
Per Stig Møllerip Irakimi naalakkersuisunik ataatsimeeqateqareerluni timmisartoqarfimmut ingerlaarnerata nalaani niuffaffimmi qaartartut pingasut ullumi tassa qaartinneqarput.
