Sterlingip ajutoornera Air Greenlandimut iluaqutaavoq
Aasaq tulliuttoq ulapaarfiusorlu nalliuteriarpat Air Greenlandip timmisartuutimini saqisussatut ilinniartittakkani affaannanngortissavai, taakkualu amerlaqataat taartaasussanik misilittagaqarluartunik Sterlingimeersunik inuttalerneqassapput.
- Aasamut timmisartuussinissamut tunngatillugu atorfiit inuttassarsiorneqartut 18-it pillugit saaffiginnissutit naliginnaasumik ullormut 15-it missaanniittaraluarput, Sterlingillu akiliisinnaajunnaarluni ajutoornerata kingorna soqutiginnillutik saaffiginnittut ullormut 60-it 75-illu akornanniittarput, taama oqarpoq Air Greenlandimi sulisoqarnermut pisortaq Kristina Kreiner.
Air Greenlandip aasaanerani timmisartumi saqisussatut ilinniartitsisarnini sapaatip akunnerini arfineq-marlunnik sivisussuseqaraluartoq Sterlingimiit
misilittagaqarluartunik sulisussaqalerneq pissutigalugu ilinniartitsineq ullunut qulinut sivikillineqarpoq.
Misilittagallit kisimik Air Greenlandimi atorfinitsinneqarneq ajortut Kristina Kreinerip erseqqissaatigaa, tassami sinerissami timmisartuussisarnerni kalaallisut oqalussinnaasunik saqisoqarnissaq piumasaqaataammat.
