Stenbakken: Angallannikkut pissutsit takornariaqarnermut kingunerlupput

Qulimiguullit Tasiilamut siornatigut sapaatip-akunneranut marloriarlutik tikittaraluartut kiffartuussinermut isumaqatigiissutitigut 2006-imi ataasiaannartinneqartalernerat takornariaqarnermut ukiorpassuarni inerisarneqarsimasumut maanna eqquinerluttoq, Tasiilami takornariaqarnermut pisortaq Anders Stenbakken isumaqarpoq:

- Namminersornerullutik Oqartussat kiffartuussinermut isumaqatigiissusiaat takornariaqarnikkut maani pisariaqartitat eqqarsaatigalugit ajorluinnarpoq, siornatigut marloriarluta tikittoqartaraluartugut maanna ataasiaannarluni tikittoqartarpoq. Anders Stenbakken oqarpoq.

Anders Stenbakkenip erseqqissaatigaa, nunatsinni helistopini ulapiffiunerpaaq Tasiilamiimmat, taamatuttaaq ukiup ingerlanerani takornariaqarnerpaaffiusartumi, tassalu juunimi juulimilu imaatigut angallannikkut qulakkiivissumik periarfissaqanngimmat.

Sapaatip-akunneranut ataasiaannarluni tikinneqartarnerup kingunerisaanik aalajangersimasumik aaqqissuussamik takornarianik tikisitsisarneq univissasoq Anders Stenbakkenip ilimagaa, 2004-mi aaqqissuussamik takornarianik tikisitsisimanerit 6 million koruuninik naleqarsimapput.

- Takornariaqarneq inuussutissarsiutit maani pingaarnersaraat, inuussutissarsiutinik allanik periarfissaasinnaasunik tigoriaannarnik soqanngilaq. Anders Stenbakken nassuiaavoq.

Aamma oqarpoq, sapinngisaminnik namminersorlutik ingerlaniarsaralutik, tamannali ajornakusoorsinnaasoq, takornarialerinermi suliassat siullersaat, tassalu angallassinermut tunngasoq aqussinnaannginnamikku.

- Angallannikkut pissutsit nalorninarpata imaluunnit periarfissaqanngivissorpat takornariaqarnikkut inerisaaniarneq asuliinnarnerussaaq. Anders Stenbakken oqarpoq.

Tasiilami takornariaqarnikkut sullissisut angallannikkut pissutsit pillugit Namminersornerullutik Oqartussanut marsimili saaffiginneqqissimagaluarput iluaqutaanngitsumilli.

- Pissutsit taamaatsillugit takornariarusullutik saaffiginnittartut angallannikkut periarfissaalatsineq peqqutigalugu itigartiinnartariaqartarpagut imaluunnit namminneq aalajangertarput tikinngitsuuinnarniarlutik. Anders Stenbakken oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat