Sten Lund: Inatsisartut ataatsimiinnerat kingulleq paatsiveerusimaarfioqaaq
- Ukiaanerani katersuunnerup immaqa una immikkoorutigaa, aningaasanut inatsisissap siullermik aalajangiiffigineqaraluarluni Aningaasaqarnermut Naalakkersuisup tunuarneratigut allamik taarserneqarnera, inatsisissallu qaqileqqinneqarnera, arlaatigut malunnarnernut immaqa ilaavoq, tassa taama aalajangiisimaneq allaannginnami immaqa aalajangiigaluarneq atortussaajunnaartinneqartutut ililluni.
Inuit ataatsimiinnermi sunamita eqqaamanerussagaat Sten Lundimut apeqqutigaarput, akivorlu:
- Qinersisartut apersorneqartarnerat naapertorlugu maannakkut eqqaamanerugunarpaat uku inuinnaat oqartussaaqataanerannut tunngatillugu Inatsisartunut ilaasortat namminneerlutik innarliinerat, tassani taasissusseqqusaanatik taamaaliortarsimanerat inuinnarnit aalassaatigineqangaatsiartoq malunnarpoq, taavalu siulittaasoqarfiup ingerlaannartumik kinguneqartitsisimannginnera Inatsisartunut ilaasortanik tatiginninnerup milleriataarnera aamma eqqartorneqangaatsiartoq Sten Lundip malunnarnerarpaa.
