Steen Lyngep naligiissaarisoqarallarnissaq akerleraa
2015-imut kommunini naligiissaarisoqarallarnissaq Naalakkersuisut siulittaasuata tulliata akerleraa.
Attaveqarnermut Peqqissutsimullu Naalakkersuisoq Steen Lynge, Atassut, aviisimi AG-imi issuarneqarluni oqarpoq naapertuilluartumik naligiissaarisoqassappat aalajangernissamut naammattunik paasissutissaqanngitsoq.
- Kommunini aningaasartuutit aaqqissugaanerat pillugu tunngaviulluinnartunik paasissutissat - ima annikitsigaat allaat maannakkut naapertuilluartumik aalajangernissamut atorsinnaanatik, Steen Lynge aviisimut ag-mut taama oqarpoq.
Ilanngullugulu apeqquserpaa innuttaasoq kommunimut allamut nuutsillugu kommuni qimanneqartoq aningaasatigut ajunngitsorsiassaqartinneqassammat.
AAMMA ATUARUK Naligiissaarinissaq inerneqarpoq: Sermersuup 54 mio. koruunit pilliutigissavai
- Kommunimi nuuffigisami innuttaasoq nooqqammersoq arlalinnik sullinneqarnissaminik pisinnaatitaaffeqarpoq, tamannalu kommunip nuuffigisap akilertussaavaa, Steen Lynge oqarpoq.
Assigiinnerusumik aaqqiisoqartariaqarsoraa
Taassuma erseqqissaatigalugu oqaatigaa - nammineq kissaatiginartinnerullugu kommunini tamani assigiinnerusumik aaqqiisoqarnissaq - aaqqiineq kommunini tamani innuttaasumut ataatsimut assigiinnik aningaasartalik orniginartinnerugamiuk.
Steen Lynge Naalakkersuisut taasineranni taamaallaat taasisinnaavoq, inatsisartunilu taasisoqarnissaannut partiimi Atassummi siulittaasoq Inatsisartunilu ilaasortaq Gerhardt Petersen taasisinnaalluni.
Kommunini naligiissaarisoqarnissamut Gerhardt Petersen isumaqataavoq Steen Lynge akerliusoq aviisi AG ullumi saqqummersoq taama allaaserisaqarpoq.